اسلام آباد۔ 16جولائی (اے پی پی) وزیر داخلہ بریگیڈیئر(ر) اعجاز احمد شاہ نا کماشی ٹی کورونا نا بابت غلط معلومداری تا تالانی ءِ توننگ کن 9 باسکی کمیٹی اس ٹہیفنگانے وخت اس کہ وزیرداخلہ پارے کہ غلط و بے پک معلومداری تا چلیفوک آتا برخلاف سخت کارروائی کننگک، غٹ ممکن وسیلہ غاتے کاریم اٹ اتسا زموار آتا پدرند ءِ خلنگک۔ پنچ شبے نادے آ وزارت داخلہ نا کنڈآن جاری بیان نارداٹ وزیر داخلہ اعجاز احمد شاہ نا کماشی ٹی کورونا نا بابت غلط انفارمیشن نا تالانی ءِ توننگ کن کمیٹی اس ٹہیفنگا۔ وزیر داخلہ کمیٹی ٹی بشخ ہلوک آتے پارت کرے کہ غلط و بے پک معلومداری تالان کروک آتا برخلاف سخت کارروائی کننگے۔ اوڈائریکٹر سائبر ونگ ایف آئی اے ءِ ہم پارت کرے کہ مانیٹرنگ و ایکشن وخت آ ہلیر و زموار آتا برخلاف دمدستی کارروائی کننگے۔ اوپارے کہ داوڑنا فیک نیوز و غلط انفارمیشن تالان کروک آک ملک و الس نا دوست افس۔ کمیٹی ءِ ٹہیفنگ نا مسخت الس اسکان سہی معلومداری تننگ ءِ پک کننگ نا ءِ۔ اوپارے کہ غلط و بے پک خبر آتا تالانی نسخاندہ پک مننگ کیک۔ نن غٹ وسیلہ غاتے کاریم اٹ اتسا زموار آتا پدرند ءِ خلینہ۔ اعجاز احمد شاہ ڈی جی پیمرا ءِ پارت کرے کہ الیکٹرانک میڈیا غا داوڑنا خبرآتے مانیٹر کننگے دافتا تالانی ءِ توننگے۔ دامشکل وخت اٹی غٹ ادارہ غاک و میڈیا تینا کڑد ءِ ادا کیر۔ ننے غٹ ءِ اواری اٹ دادین انا مقابلہ ءِ کروئی ءِ۔ اوپارے کہ نن حکومتی کہول آ الس کن دے و نن کاریم کننگ ءُ۔ اوپارے کہ ٹہیفوک آ کمیٹی ٹی کل 9 باسک اوار ءُ ہرانا کماشی ءِ وزیر داخلہ اعجاز احمد شاہ کیک۔ وخت اس کہ ڈاکٹر فیصل سلطان بطورسینئر باسک بشخ ہلیک۔ داکان بیدس وزارت داخلہ، ایف آئی اے، پی ٹی اے، پیمرا و این سی اوسی نا نمائندہ غاک کمیٹی نا بشخ ءُ۔ کمیٹی باقاعدہ وڑاٹ ملک و لائحہ عمل نا رداٹ داغلط انفارمیشن نا تالانی ءِ توننگ اٹ تینا کڑد ءِ اداکیک۔
