اسلام آباد۔ 16 جولائی (اے پی پی) وزیر حوالکاری و شینکاری سینیٹر شبلی فراز پارینے کہ ہاؤسنگ ڈٹ آن زرگزرانی سرجزآتے مون آ دننگک، ملازمت آتا بھلو وارخواہی اس ودی مریک، نیزگار و کم کٹیا کروک بندغ آتے چھت دُوبریک، تعمیراتی بشخ اٹی 400 ارب روپئی نا پروجیکٹ اس بناکننگ والااُن، زرکار آتیکن 31 دسمبر اسکان دا آسراتی آن فائدہ ہرفنگ نا جوان ءُ موقع اسے، ہاؤسنگ ڈٹ اٹ بروک آ اڑاند آتے مُر کننگ کن جامع حکمت عملی اسے نا کمک اٹ گام گیج کننگ انگ ءِ۔ داخیال آتا درشانیءِ اوپنچ شنبے نادے آ وزیراعظم نا خصوصی کمکار احساس پروگرام ڈاکٹر ثانیہ نشتر تون اوار پریس کانفرنس آن تران کرسا کرے۔ سینیٹر شبلی فراز پارے کہ کورونا نا سوب ننا مخلوق ہمو تکلیف آتے خنتوس ہرافتے ایلو ملک آک خنار۔ اوپارے کہ کورونا غان مست زرگزرانی حالیت آک جوان ئسر ولے کورونا دین انا سوب زرگزران آ اثرتما۔ الس نا راجی آسراتی و آسراتی تا فراوانی حکومت نا اولیت ءِ۔ دین اٹی حکومت الس ءِ مشکل آتیان بچفنگ کن سنبرینگوک ئس۔ اوپارے کہ قومی رابطہ کمیٹی نا دیوان آتا مسخت غٹ بشخ آتیٹی رابطہ غاتے سوگو کننگ نا ءِ۔ وزیراعظم نا کماشی ٹی قومی رابطہ کمیٹی نا دیوان اٹی ملک انا پنی آ زرکار عقیل کریم ڈھیڈی، عارف حبیب، حسن بخشی و محسن سبحانی تون اوار ایلوفک بشخ ہلکر۔ دیوان اٹی اسٹیٹ بینک تون اوار غٹ تعلقدار ادارہ غاتا نمائندہ غاک ہم بشخ ہلکر۔ دیوان اٹی ہاؤسنگ ڈٹ انا رداٹ خراج تون اوار ایلو باندات آتیا چندی سلاہ پیش کننگا۔ بنجائی وزیر پارے کہ زرگزران نا زہم آک نیامی تپہ یا نیزگارمخلوق آ زیات تمرہ۔ وزیراعظم عمران خان نا گام گیج آتا وت زرگزرانی وڑاٹ نزور و مڈل تپہ ءِ۔ غٹ پالیسی تیٹی نادارتپہ غاتیا چکار کننگانے۔ اوپارے کہ تعمیراتی بشخ انا شونداری وخت انا گرج ءِ۔ دا بشخ انا شونداری آن ایلو تعلقدار بشخ آتا سرجزآتے مون آ دننگک۔ دا ڈٹ انا پوروی آن نیزگارآتے چھت ملک۔ اوپارے کہ دا ڈٹ انا رداٹ پیشن نا ملک آتیٹی رہینگوک آ پاکستانی زرکارآتے زرکاری نا وارخواہی فراوان کننگک۔ اوفتا مشکل آتا ایسری کن ون ونڈو نا آسراتی فراوان کننگک۔ دا ڈٹ ملک انا نیزگارآتیکن اہم ءِ انتئے کہ داڑآن نئے بیرہ اوفتے چھت ملک بلکن ملازمت آتا بھلو وارخواہی اس ہم ودی مریک۔ اوپارے کہ تعمیراتی بشخ اٹی 400 ارب روپئی نا پروجیکٹ اس بناکننگ والا اُن۔ دا ڈٹ ہاؤسنگ نا بشخ ءِ بدل کرسا ہلک۔ اوپارے کہ آئی ایم ایف، فٹیف تون اوار جہانی ادارہ غاتا کنڈآن پاکستان ءِ کورونا دین انا سوب آن ہراآسراتی رسینگانے داڑآن 31 دسمبر اسکان فائدہ ہرفنگ مریک۔ اوپارے کہ ہاؤسنگ ڈٹ آ ترندی اٹ عملدرآمد کن بنجائی و صوبائی کہول آ ٹاسک فورس اس جوڑ کننگانے۔ دا ٹاسک فورس ہڑدے ئی بنداو آ وزیراعظم ءِ رپورٹ ایتک۔ ہنداوڑ قومی رابطہ کمیٹی نا دیوان ہفتہ ٹی اِرا وار مریک تانکہ دا بشخ ءِ مون تروک مشکل آتے مُر کننگ مرے۔ اوپارے کہ نقشہ غاتون اوار غٹ باندات آتیا سرجم گپ وتران مس۔ تعمیراتی بشخ اتون گنڈوک بندغ آتے وام تننگ نا وڑوڈول آہم شرہ مس۔ ہاؤسنگ ڈٹ انا بابت پیدوار حکمت عملی اس جوڑ کننگانے۔ غٹ باندات آتے پورو کننگ اٹ آسانی ودی کننگک۔ پنچ مرلہ نا اُراکن وام 5 درسد شرح منافع غا و 10 مرلہ اُراکن 10 درسد شرح منافع غا وام تننگک وخت اس کہ حکومت جم خڑچ آ 3 لکھ روپئی نا سبسڈی ایتک۔ اوپارے کہ غٹ بینک آک نجی بشخ اٹی زرکاری نا 5 درسد تعمیرات نا بشخ اکن جتا کیرہ ہرا سالانہ 330ارب روپئی مریرہ۔ اوپارے کہ ہراغریب بندغ اُراہلنگ کپک او دا ڈٹ آن اُرانا مالک مریک۔ اوپارے کہ ملک اٹی تعمیراتی بشخ انا سرجزآتیٹی ترندی بسنے۔ سی ڈی اے نا پلاٹ آتا بولی گمان آن زیات لگانے۔ اوپارے کہ غٹ صوبہ غاتا چیف سیکرٹری تیان دا ڈٹ آ پیش رفت نا رپورٹ ہلنگک۔ اوپارے کہ تعمیراتی بشخ انا شونداری آن زرگزران بحال مریک۔
