اسلام آباد۔ 16 جولائی (اے پی پی) صدر مملکت ڈاکٹر عارف علوی بنجائی محتسب نا کارکڑد انا ستاءِ کرسا لس بندغ ءِ درگہ غا دمدستی و اڑزآن انصاف فراوان کننگ نا گرج آ زور شاغانے۔ داخیال آتا درشانی ءِ او بنجائی محتسب سید طاہر شہباز تون ایوان صدر اٹی اوڑدہی ٹی کرے۔ بنجائی محتسب سید طاہر شہباز صدر مملکت ءِ تینا ادارہ نا کارکڑد آن معلومدار کرے۔ اوپرے کہ 2019ء ٹی 75 ہزار آن زیات کیس آتے سرتننگا ہرافتیان 97 درسد کیس آتا فیصلہ غاتیا عملدرآمد کننگا۔ اوپارے کہ بنجائی محتسب نا 1039 کیس آتیٹی نظرثانی نا اپیل دائر کننگا وخت اس کہ 317 کیس آتیٹی صدر پاکستان ءِ اپیل دائر کننگا ہراکہ جم کیس آتا 0.4 درسد مریرہ۔ اوپارے کہ صدر مملکت بنجائی محتسب نا 90 درسد فیصلہ غاتے برجاتخا اوپارے کہ 2019ء ءِ آگاہی نا سال انا وڑاٹ اڈتننگا ہنداخاطرآن الیکٹرانک پرنٹ و سوشل میڈیا نا کمک اٹ جامع آگاہی مہم چلیفنگا، دامہم نا سوب آن بلوچستان، سویلی پنجاب وایبٹ آباد آن کیس آتا درج کننگ نا کچ اٹی نمان ودکی مس۔ اوپارے کہ بلوچستان، بہاولپور، ملتان لاہور، پشاور و ایبٹ آباد نا مر مر انگا علاقہ و چندی یونیورسٹی تیٹی سیمینار اڈتننگا۔ اسپیکر قومی اسمبلی، چیئرمین سینیٹ، گورنر پنجاب، گورنر سندھ، گورنر خیبرپختونخوا و پارلیمنٹ نا باسک آتے بنجائی محتسب نا کارکڑد آن معلومدار کننگا ۔ اوپارے کہ غاوتا ازالہ نا وڑوڈول اٹی گچینی اتنگانے۔ بنجائی محتسب نا دہ علاقائی دفتر آتا آفیسر آک آؤٹ ریچ کمپلینٹ ریزولیشن پروگرام نا رداٹ 72 ضلع و تحصیل آتا 370 دورہ کریر اوپارے کہ دا کیس آتا 60 دے تیٹی فیصلہ ءِ کننگا وخت اس کہ نظرثانی اپیل آتا 45 دے ٹی فیصلہ کننگا۔ اوپارے کہ بنجائی محتسب 247 بنجائی ادارہ غاتون رابطہ ٹی ئس۔ داادارہ غاتا فوکل پرسن پندار کننگاسس۔ ہراکہ 30 دےاٹی غاو تا فیصلہ ءِ کننگ نا پابند ئسر۔ اگہ تعلقدار ادارہ تخوک آ وخت آ دا کیس انا فیصلہ ءِ کتو تو داپورٹل نا کمک اٹ تینٹ بنجائی محتسبءِ منتقل مس۔ و غاوتا سرتننگ نامربوط وڑوڈول آئی سی آر نا رداٹ پوسکن آ غاوتیٹی بدل مس۔ اومستی پارے کہ جنوری 2020ء آن جون 2020ء اسکان 47 ہزار آن زیات کیس رجسٹرڈ کننگانے ہراککہ تدوک آ سال انا مقابلہ ٹی 38 درسد زیات ءُ اوپارے کہ کورونا دین انا سوب آن غاوتارجسٹریشن نا عمل زہمی متنے 60 درسد مقدمہ غاتا رجسٹریشن آن لائن سسٹم نا کمک اٹ کننگا، اوپارے کہ سپریم کورٹ نا پارت آتا رداٹ جیل تیٹی بندی تا حالیت زار اٹ گچینی کن کوشست کننگا۔ اوپارے کہ نظام انصاف نااڑاند آتے اسہ کنڈ کرسا جیل انا حالیت زار ءِ گچین کننگ آ چکار کننگا اوپارے کہ ہر جیل اٹی اسہ نفسیات نا چاہندار و اسہ ڈاکٹر اسے نا ساڑی مننگ ءِ پک کننگانے، غٹ جیل تیٹی ذہنی مرض آتا بندی تے جتا کننگانے دابابت صوبائی چیف سیکرٹری و ایلو تعلقدار کڑدہ غاتون 12 دیوان آتیان پد ششماہی رپورٹ سپریم کورٹ اٹ جمع کرفنگانے۔ اوپارے کہ پیشن نا ملک رہینگوک آ پاکستانی تا راجی آسراتی کن ہم گام گیج کننگانے مچ آملک انا 8 جہانی بالی پٹ آتیاون ونڈو فیسلیٹیشن ڈیسک جوڑ کننگانے ہراڑے بیست ءُ چار گھنٹہ دُوانزدہ محکمہ غاتا آفیسر پیشن نا ملک رہینگوک آ پاکستانی تا کمک کن ساڑی مریرہ۔ صدر مملکت ڈاکٹر عارف علوی بنجائی محتسب نا کارکڑد و خصوصی گام گیج آتا ستاءِ کرسا اومیت ظاہر کرے کہ بنجائی محتسب انتظامی ناانصافی نا برخلاف مخلوق نا کمک کن کوشست آتے برجاتخک۔
