اسلام آباد۔ 16 جولائی (اے پی پی) وزیراعظم عمران خان نا ورناتیکن گام گیج آتا زبردست است بڈی، جہانی کہول آ پاکستان ءِ اسہ پین بھلو اعزاز اس ملا۔ پاکسان شنگھائی کمکار تنظیم ءِ یوتھ کونسل نا آخبتی باسک جوڑ مس، شنگھائی کمکار تنظیم پاکستان نا دفترخارجہ ءِ معلومدارکرے ۔ دابابت وزیراعظم نا خصوصی کمکار امور نوجوانان عثمان ڈار ویڈیو بیان اس جاری کرے، پاکستان کن جوان ءُ خبر اسے ہرادے ورناتتون شیئر کننگ خواوہ۔ اوپارے کہ پاکستان ءِ شنگھائی کمکار تنظیم ’’ایس سی او‘‘ نا آخبتی باسک جوڑ کننگانے ، داغٹ حکومتی گام گیج و وزیراعظم نا پدریسہ کوشست آتا بھرم اٹ ممکن مس۔ اوپارے کہ وزیراعظم نا سرسہب ورنا پروگرام و یوتھ کونسل نا جوڑ کننگ سہی ءُ فیصلہ اس ئس۔ پاکستانی ورناک داسہ’’ایس سی او‘‘ نا یوتھ کونسل دیوان اٹی بشخ ہلنگ کیرہ، اوپارے کہ اسکل ڈویلپمنٹ نا پروگرام تیٹی نان ورناتا بشخ ہلنگ ممکن مننگ کیک، اہم پیش رفت آ ای وزیر خارجہ شاہ محمود قریشی و دفترخارجہ نا ٹیم انا ہم منت واراُٹ۔
