اسلام آباد۔ 16 جولائی (اے پی پی) وزیراعظم نا خصوصی کمکار جان جوڑی ڈاکٹر ظفرمرزا پارینے کہ کورونا دین انا ننا زرگزران آ خراب ءُ زہم اس تمانے، پولیو مہم آتا مفننگ نا سوب آن چناتے پولیو وائرس نا گڑتی مون تروک ءِ، ننے داسہ ساڑی آ وخت اٹی کورونا تون زند ءِ تیر کننگ نا گرج ءِ، ای غٹ لمہ و باوہ غاتیان خواست کیوہ کہ او تینا چناتے مچ آ وئی نا معذوری آن بچفنگ کن انسداد پولیو نا پڑی ضرور کنفر۔ چناتا گچین جان جوڑی ءِ اولیت ایتنہ۔ پنچ شنبے نادے آ وزارت نا کنڈآن جاری بیان اٹی او پارے کہ دُوارہ پولیو مہم نا بنانا ڈٹ بندی صوبہ غاتون تین پہ تینی سلابت اٹ ترتیب تننگا و جون انا تُواٹی باقاعدہ پولیو نا ٹیکنیکل ایڈوائزری پڑک آن منظوری ءِ ہلنگا۔ ڈٹ بندی نا رداٹ اگست و ستمبر اٹی خاص انگا علاقہ غاتیٹی و 2020 ٹی مسہ قومی مہم چلیفنگ نا حکمت عملی اس جوڑ کننگانے۔ وزیراعظم عمران خان نا کماشی ٹی مروک آ 4 جولائی آ نیشنل کمانڈ اینڈ کنٹرول نا دیوان اٹی دُوارہ پولیو مہم نا بناءِ کننگ نا فیصلہ نا ستاءِ کننگا۔ دادیوان اٹی صوبہ غاتا چیف سیکرٹریک ہم بشخ ہلکوسر۔ ترجمان نا رداٹ کورونا دین انا سوب آن چار تُو آن پد 20 جولائی آن چنکو کچ اسے ٹی دُوارہ پولیو مہم نا بناءِ کننگ انگ ءِ، دا چرجوئی ٹی فیصل آباد، اٹک، سویلی وزیرستان نا ضلع غاتیان بیدس کراچی و کوئٹہ نا خاص انگا ضلع غاتیٹی پنچ سال آن کم ہشت لکھ چناتے انسداد پولیو نا پڑی کنفنگک۔ وزارت جان جوڑی و پولیو نا چٹفنگ نا جہانی گام گیج(جی پی ای آئی) نا پارت آتے مون آ تخسا پاکستان پولیو پروگرام غٹ مہم آتے پد بٹیسس۔ و پروگرام ءِ کورونا دین انا گچین نگرانی نا زمواری ءِ تننگا۔ پاکستان انسداد پولیو پروگرام مچ آ پاکستان آن جوان وڑٹ کورونا، پولیو و ایلو ناجوڑی تا چاروکی ءِ کرے، لاک ڈاؤن، اوپی ڈی تا بند مننگ و ہن و بر نا آسراتی تا مفننگ نا سوب آن ناجوڑی تاانسداد نا مہم آک مننگ کتوس۔ اسہ کساس اسے نا رداٹ تُوئی اوسط ہفت لکھ پوسکن ودی مروک آ چناتے المی ویکسین تننگ نا چرجوئی زہمی مس۔ وخت اس کہ ایلو کنڈآ اُرااُرا غاہنسا مہم زہمی مننگ آن چناتیٹی قوت مدافعت نا ویل ودی مس۔ دسمبر 2019ء و مارچ 2020ء ٹی سرسہب پولیو مہم چلیفنگ آن پد مہم مفننگ نا سوب آن خراب ءُ زہم اس تما۔ ہنداخاطرآن ڈبلیو پی وی ون و ٹائپ ٹو وائرس نا ودنگ نا رسک ودانے۔ ترجمان نا رداٹ کوارڈینیٹر قومی ایمرجنسی آپریشنز سنٹر ڈاکٹر رانا محمد صفدر پارے کہ مہالو داوڑنا علاقہ غاتیٹی مہم چلیفنگ انگ ءِ ہراڑے وائرس زیات ءِ، دامہم کن کورونا دین انا سوب اسٹاف ءِ خصوصی تربیت تننگانے کہ ہراوڑ فاصلہ تخسا مہم ءِ چلیفینہ، اومستی پارے کہ اُرا اُراٹی مروک آ مہم اٹی کورونا نا بابت آگہی ہم تالان کننگک، راج انا غٹ مکتبہ فکر و خاص وڑاٹ لمہ وباوہ مہم ناسرسہبی ٹی تینا کڑد ءِ ادا کیر۔ پاکستان و اوغانستان دنیا نا اِرا ملک ءُ ہراڑے پولیو ناجوڑی داسکان ارے۔ پاکستان ءِ پولیو نا چٹفنگ کن ساڑی آ وخت اٹی بھلو چیلنج مون تروک ءِ، داسال داتم اسکان پولیو نا 58 کیس رپورٹ مسنے ہرافتے ٹی 21 خیبر پختونخوا، 20 سندھ، 14 بلوچستان و 3 پنجاب آن مون آ بسنے۔ اوپارے کہ پولیو آن پنچ سال اسکان نا وئی نا چناک زہمی مریرہ۔ داناجوڑی آن چناک مچ آ وئی کن معذور مریرہ۔ حتی کہ چناک کہیرہ ہم، دا ہلوک آ مرض آن چناتے پولیو آن بچفنگ نا پڑی کنفسا جان ءِ چٹفنگ مریک۔ پنچ سال آن کم وئی چناتے پولیو پڑی کنفسا داوائرس اٹ اختہ مننگ آن بچفنگ مریک۔ وار وار آ پولیو نا پڑی کنفنگ آن دنیا نا غٹ ملک آک پولیو آن پاک مسنو۔ انسداد پولیو مہم اٹی زیات آن زیات بشخ ہلنگ ننا غٹ انا قومی فرض ءِ۔
