اسلام آباد۔ 28 فروری (اے پی پی) آڈیٹر جنرل آف پاکستان رانا اسد امین بیجنگ اٹی چین نا آڈیٹر جنرل لیوجیائی تون اوڑدہی کرے ہراٹی ہڑتوم آ ملک آتا نیام اٹ کمکاری ٹی ودکی تون اوار تین پہ تینی است خواہی نا معاملہ غاتیا خیال آتا درشانی ئِ کننگا۔ اوڑدہی ٹی تین پہ تینی کہول آ رابطہ، شعبہ آڈٹ نا افسر آتا درشانی و اوفتا کاریم نا کچ اٹی ودکی تون اوار ایلو معاملہ غاتیا خیال آتا درشانی ئِ کننگا۔ داوخت آ مفاہمت نا یات داشت آتیا ہم دستخط کننگا۔ چین نا آڈیٹر جنرل لیوجیائی داوخت آ خیال آتا درشانی ئِ کرسا پارے کہ ہڑتوم آ ملک آتا آڈٹ نا ادارہ غاتا نیام اٹ خڑکی کمکاری نا گرج ئِ۔ آڈیٹر جنرل آف پاکستان تینا چینی ہم منصب نا منت وار ی ئِ ادا کرسا پارے کہ اونا چین نا دورہ غان ہڑتوم آ ملک آتا نیام اٹ تعلقداریک پین سوگو مریرہ۔ اوتینا چینی ہم منصب ئِ دورہ پاکستان نا ہم سلہ خلک۔ چین اٹی پاکستان نا سفیر مسعود خالد ہڑتوم آ ملک آتا نیام اٹ مفاہمت نا یات داشت آتا خیرمقدم ئِ کرسا اودے ہڑتوم آ ملک آتا نیام اٹ تعلقداری تے پین سوگو جوڑ کننگ نا کنڈا اہم ئُ پیش رفت اس گوندا۔
