توانائی ءِ وفاقی وزیر سردار اویس احمد خان لغاری ءَ ڈورنیئر گروپ ءُ ای وائی پارتھینن ءِ نیمگ ءَ تیار کتگیں بینک ءِ لائکیں فزیبلٹی اسٹڈی پیش کنگ بوتگ

اسلام آباد۔23جون  (اے پی پی): توانائی ءِ وفاقی وزیر سردار اویس احمد خان لغاری ءَ را ڈورنیئر گروپ ءُ ای وائی پارتھینن ءِ نیمگ ءَ تیار کتگیں بینک ایبل فزیبلٹی اسٹڈی پیش کنگ بوت۔ پٹ ءُ پول ءِ رد ءَ پاکستان آیوکیں 26سال آنی تہ ءَ درآمد بوتگیں کوئلہ ءِ بدل ءَ دمگی تھر کوئلہ ءِ کارمرز کنگ ءَ 3.239ارب ڈالر ءِ بچت ءِ وس ءَ کنت۔ پاور ڈویژن ءِ جارکش ءِ رد ءَ اے راجدپتری بدلی جمشورو پاور پلانٹ یونٹ 01 ءَ چہ کارمرز کنگ بیت کہ پاکستان ءِ دیمروئی کتگیں (الٹرا سپر کریٹیکل) پاور پلانٹ اِنت کہ ایشی ءِ تہ ءَ درآمدیں کوئلہ ءِ بدل ءَ 100درسد لوکل تھر لگنائٹ کارمرد کنگ بیت۔ فزیبلٹی اسٹڈی ءِ رد ءَ اے بدلی تکنیکی، معاشی ءُ چاگردی رد ءَ سرجم ءَ ممکن اِنت۔ اے بدلی ءَ چہ ایوک ءَ 2.113ارب ڈالر ءِ درملکی زرّ ءِ بچت بیت، ایشی ءَ چہ پاکستان ءِ درملکی زرّ ءِ ذخائر مھکم بنت ءُ درآمد بوتگیں کوئلہ ءِ نرخ ءُ زرّ ءِ شرح ءِ تہ ءَ ردوم ءُ بدلی ءِ رسک ءَ چہ ریلیف رسیت۔ لاگت ءُ فائدہ ءِ تناسب 1.8x اِنت کہ اے درستیں جاوراں سک سازگار اِنت۔ اے منصوبگ ءَ چہ بجلی ءِ شوبگ ءَ را خالص فائدہ 1.720ارب ڈالر بیت ایشی ءِ تہ ءَ 1.051ارب ڈالر پیداواری ھرچ ءُ درچ ءِ بچت ءُ تھر کان ءِ توسیپ ءَ چہ 669ملین ڈالر ءِ گیشیں فائدہ ھوار اِنت۔ حکومت درملکی وام آنی سر ءَ سود ءِ ھرچ ءُ درچ ءِ تہ ءَ 1.519ارب ڈالر ءِ بچت کنت ءُ کلیں معاشی نپ 3.239ارب ڈالر ءَ سر بیت۔ آئی ءَ گوشت کہ اے بدلی ءِ کلیں ھرچ 116.6ملین ڈالر اِنت کہ ایشی ءِ تہ ءَ اپ فرنٹ کیپیٹل 86.2ملین ڈالر اِنت۔ اے منصوبہ براؤن فیلڈ ترمیم ءِ دروشم ءَ جوڑ کنگ بوتگ، ایشی ءَ چہ کوئلہ ءِ ہچ وڑیں نوکیں گنجائش گیش نہ بیت، بلے ہدف مندیں انجینئرنگ ءِ بدلی ءِ وسیلگ ءَ استیں پلانٹ ءِ ارزشت ءَ برجاہ دارگ بیت۔ اے منصوبگ ءَ چہ تھرپارکر ءَ روزگار ءُ بنیاتی ڈھانچہ ءَ را گیش کنگ بیت وھدیکہ درآمد بوتگیں کوئلہ ءِ سر ءَ انحصار ءَ را ھلاس کنگ ءُ توانائی ءِ وت واجہی ءِ راہ پچ کنگ بیت کہ اے بجلی ءِ شوبگ ءِ اصلاحات منصوبگ ءِ چیر دستی ءَ دیسی وسیلگ آناں دیمروئی دیگ ءِ حکومت ءِ جزم ءِ درشان اِنت۔ توانائی ءِ وزیر ءَ وت اے منصوبگ ءِ نگرانی ءِ واستہ یک مزن تک ءِ سٹیئرنگ کمیٹی جوڑ کتگ ات کہ ایشی ءِ تہ ءَ 38 دیوان بوتگ ات کہ ایشی ءِ تہ ءَ 15 دیوان ءِ سروکی وزیر ءَ وت کتگ ات۔ اے دیوان آنی تہ ءَ ریگولیٹرز، قرضہ دیوک، تکنیکی ماہرین ءُ منصوبگ ءِ اسپانسر آنی گوما مشورہ کنگ بوتگ ءُ پیشرفت ءِ تہ ءَ رکاوٹ جوڑ کنوکیں کلیدی جیڈھ آناں گیش ءُ گیوار کنگ بوتگ۔ وزیر توانائی ءَ کے الیکٹرک (کے ای)، جامشورو پاور کمپنی (جے پی سی ایل) ءُ پرائیویٹ پاور اینڈ انفراسٹرکچر بورڈ ءِ ھاسیں منت واری ءِ درشانی کت کہ آہانی سرجمیں کمک ءَ اے فزیبلٹی اسٹڈی ممکن بوتگ۔ ترجمان ءَ گوشت کہ اے منصوبگ مزن وزیر شہباز شریف ءِ بجلی ءِ شوبگ ءِ اصلاحات منصوبگ ءِ یک کلیدی ستون اِنت، کہ توانائی ءِ شوبگ ءَ بنجاہی وسیلگ، مالیاتی استحکام، ءُ دراجیں مدتی توانائی ءِ سلامتی ءِ دیمروئی ءِ جزم ءِ درشان اِنت۔