صدر آصف علی زرداری ءَ اسلامی جمہوریہ ایران ءِ صدر ڈاکٹر مسعود پزشکیان ءَ گوں گند ءُ نند کتگ ءُ وت مہ وتی سیت ءِ جیڈھ آنی سر ءَ گپ ءُ تران

اسلام آباد۔23جون  (اے پی پی): ایران ءِ صدر ڈاکٹر مسعود پزشکیان  ءَ گوں مملکت آصف علی زرداری ءَ سئے شمبے ءِ روچ ءَ ایوان ءِ صدر ءَ گند ءُ نند کت۔ سفیر رضا امیری مغدام ھم ساڑی ات۔ صدر ءِ مملکت ءِ پریس ونگ ءِ نیمگ ءَ چہ جاڑی بوتگیں بیان ءِ رد ءَ نائب مزن وزیر ءُ دری کارانی وزیر سینیٹر محمد اسحاق ڈار، چیئرمین پاکستان پیپلز پارٹی  ءُ   پیسریگیں  وزیر خارجہ بلاول بھٹو زرداری، وفاقی وزیر داخلہ سید محسن رضا نقوی، وزیر مملکت برائے داخلہ طلال چوہدری، چیف وِہپ سینیٹ سینیٹر سلیم مانڈوی  والا  ءُ  ڈاکٹر عاصم حسین  ءَ اے دیوان ءَ بہر زرتگ۔ وش آتک کنگ ءِ ساھت ءَ آئی ءَ گوشت کہ اے تر ءُ تاب دوئیں ملک آنی نیام ءَ دیریں براتی سیادی ءِ درشان انت ءُ وشی ءُ غم ءِ تہ ءَ یک ءِ دومیگ ءِ گوما اوشتگ ءِ جزم انت۔ آئی ءَ صدر ءِ مملکت ءَ را اسلام آباد تپاک نامہ ءِ سر ءَ دستخط کنگ ءِ پد ءَ مبارکی دات ءُ امیت کت کہ برجاھیں ٹیکنیکل تک ءِ گپ ءُ تران ءَ چہ پڑ ءَ دائمی امن ءِ برجائی بیت۔ صدر آصف علی زرداری ءَ ایران ءِ امن، استحکام، راجی یکوئی، حاکمیت ءُ سرزمین ءِ یکوئی ءِ واستہ پاکستان ءِ اصولی کمک ءِ یک رندے پدا گوشت۔ آئی ءَ گوشت کہ پاکستان مُدام یک نیمگی کارروائی آنی ھلاپ ءَ بوتگ ءُ دمگی ءُ جھان ءِ چیلنج آنی پجائی گیواری ءِ واستہ گپ ءُ تران ءُ سفارتکاری ءِ کمک ءَ کنت۔ آئی ءَ مسلم امت ءِ یکوئی ءِ رکھینگ ءُ خلیج ءِ ملک آنی گوما مھکمیں براتی سیادی ءِ برجائی ءِ واستہ پاکستان ءِ جزم ءِ سر ءَ ھم زور پر دات۔ صدر آصف علی زرداری ءَ یک رندے پد ءَ آیت اللہ علی حسینی خامنہ ای ءِ شہیدی ءِ سر ءَ دلپدردی ءِ درشان کنان ءَ گوشت کہ پاکستان آئی ءِ جنر ءِ سر ءَ بھر زوریت ۔ آئی ءَ گوشت کہ ایران پاکستان ءِ گوما وتی سیادی آناں سک باز ارزشت دنت ءُ سیاسی، اقتصادی، ایمنی ءُ دمگی کار آنی تہ ءَ کمک ءَ را گیش پراھی کنگ ءِ واھشت مند اِنت۔