اسلام آباد۔ 28 فروری (اے پی پی) قومی اسمبلی نا قائمہ کمیٹی اطلاعات ، نشریات و قومی میرات ، قومی میرات و ادبی ڈویژن نا چندی برجاو پوسکن آ ڈٹ آتے کن پبلک سیکٹر ڈویلپمنٹ پروگرام (پی ایس ڈی پی2017-18) کن سلاہ غاتا منظوری ئِ تس ، کمیٹی نیشنل کونسل آف آرٹس، لوک ورثہ، پیشن نا ملک آتا چیئرز و نیشنل آرکائیوز ئِ وزارت اطلاعات و نشریات و قومی میرات نا ماتحت کننگ و فنکار ، مصور وموسیقار آتے کن جتا فنڈ قائم کننگ نا سفارش ہم کرینے۔ سے شنبے آکمیٹی نا دیوان محمد اسلم بودلہ نا کماشی ٹی قومی میرات و ادبی ڈویژن اٹی اڈ ہلک۔ وزیراعظم نا سلاہکار قومی میرات و ادبی ڈویژن عرفان صدیقی، کمیٹی نا باسک و ڈویژن نا بڑزکو افسر آک دیوان اٹی بشخ ہلکر۔ قومی میرات و ادبی ڈویژن نا کمامدارآک کمیٹی ئِ بریفنگ ترسا پاریر کہ اسلام آباد اٹی جہانی کہول آ ہچ ئُ میوزم اس اف۔ لوک ورثہ ٹی اسہ میوزم اسے نا جوڑ جاڑ نا ڈٹ ئِ، بنائی وڑاٹ دانا ڈیزائننگ کن کم و ود 30 لکھ روپئی، کمپیوٹرائزڈ اردو ڈکشنری و سوفٹ ویئر فارموبائل ایپ کن 14.36ملین، نیشنل بک فاﺅنڈیشن کن پوسکن آ ازباب آتا ہلنگ کن 2کروڑ 80 لکھ، کراچی ٹی شار کتاب نا جوڑ جاڑ کن اسہ کروڑ 10لکھ روپئی، قومی زبان نا شونداری کن اسہ کروڑ روپئی، پاکستان اکادمی ادیبات اٹی پین کمرہ غاتا جوڑ جاڑ کن اسہ کروڑ 50لکھ روپئی تون اوار 20 ڈٹ آتے پی ایس ڈی پی 2017-18 ٹی اوار کننگ نا سلاہ پیش کریر ہرافتے کمیٹی امنائی اٹ منظور کرے۔ وزیراعظم نا سلاہکار قومی میرات و ادبی ڈویژن عرفان صدیقی کمیٹی ئِ پارے کہ ننا ڈویژن رولز و ڈرافٹنگ کن 32کتاب آتے ہم اردو فراوان کرینے۔ اوپارے کہ افسرآتے کن انگریزی آن اردواٹی بننگ اٹی مشکل ارے ولے دابابت کوشست آک برجائُ، نن داسہ تینا پوسکن آ نسل ئِ تختی و دوات آ اتنگ کپنہ ولے اوفتے پوسکن آ ٹیکنالوجی ٹی اردو نا کاریم اٹ اتنگ نا کنڈآ راغب کننگ مریک۔ اوپار ے کہ وزیراعظم ہندی زبان تا خذمت آایوارڈ نا کچ ئِ 12آن ودفسا 20 کرینے۔ اوپارے کہ اردو ننا قومی زبان ئِ و اُراتیٹی داسہ اردو ٹی ہیت وگپ کننگک، ننے غٹ لمئی آ بولی تا است بڈی نا گرج ئِ۔ اوپارے کہ اردوزبان نا اسہ سوفٹ ویئر اس تیار کینہ ہراٹی اردوزبان نا بابت غٹ جملہ و آرٹیکل آک اوار مریرہ۔ اوپارے کہ لاہور اٹی ایوان اقبال کمپلیکس نا ایئر کنڈیشنگ نظام ئِ گچین جوڑ کننگ کن ہم فنڈ درکار ئِ ، داڈٹ ئِ وش لسٹ اٹی اوار کننگے ہرا دے پلاننگ کمیشن آ گدریفنگک۔ عرفان صدیقی پارے کہ نیشنل آرکائیو ٹی تاریخی دستاویز آتا انبار لگوک ئِ و اودے نسخان رسینگ نا گڑتی ساڑی ئِ ، دا ادارہ بھلو وخت اسسکان لاوارث مسنے ، نن بچوک آگڑاتے رکھوک کننگ نا کوشست کننگ اُن، نیشنل آرکائیو کن کابینہ ڈویژن ئِ نوشتہ کرین ولے او منیتو، اوکمیٹی ئِ پارے کہ نیشنل آرکائیو و پیشن نا ملک چیئرہراقومی میرات آک ئُ داوخت لاوارث ئُ، ہنداوڑ اقبال و قائد اعظم چیئرو نیشنل آرکائیو زکابینہ ڈویژن نا سرپرستی ٹی ئُ، کمیٹی دا ادارہ غاتے وزارت اطلاعات نا ماتحت کننگ نا سفارش کرے۔ عرفان صدیقی پارے کہ کمیٹی ننا کارکڑد آ است جمی نا درشانی ئِ کرے ہراڑآ کمیٹی نا راہشونی و سرپرستی نا منت وار اُن۔ کمیٹی نا باسک عمران لغاری پارے کہ پاکستان نا تاریخ نا اولیکو بھلا میوزیم جوڑ مننگ والا ئِ ، کمیٹی نا غٹ باسک آک دانا پوروی نا مخ تفی ئِ کیرہ۔ باسک کمیٹی ڈاکٹر اظہر جدون پارے کہ ننے ڈٹ آتے ہرسا سفارش تروئی مرے انتس کہ کینہ گچینی کن کینہ۔
