اسلام آباد۔ 28 فروری (اے پی پی) قومی احتساب بیورو(نیب) نا چیئرمین قمر زمان چوہدری پارینے کہ نیب ملک آن ہردروشم اٹی بدعنوانی نا چٹفنگ کن غٹ وسیلہ غاتے کاریم اٹ اتنگ ئِ ، ملک انا پائیدار راجی و اقتصادی شونداری، زرکاری کن ہر بہاآ بدعنوانی نا چٹفنگ المی ئِ، نیب ملک آن بدعنوانی نا توننگ کن سہ جہتی حکمت عملی آ عمل کننگ ئِ ہراکہ آگاہی، تدارک و کانود آ عملدرآمد آٹی ئِ۔ نیب انا کانود آ عملدرآمد نا گام آن بدعنوانی نا برخلاف مہم اٹی ترندی بسنے ہرانا جم وڑاٹ مثبت زئم مون آ بسنے۔ داخیال آتا درشانی ئِ او نیب انا غٹ بشخ آتا کارکڑد نا جاچ انا بابت دیوان نا کماشی ئِ کرساکرے۔ اوپارے کہ بدعنوانی غٹ برائی تا ماس ئِ و ملک انا شونداری و شونہالی نا عمل زہمی مسکہ، داڑتون آہنی دوتے اٹ مون تننگک۔ ملک انا پائیدار راجی و اقتصادی شونداری، زرکاری کن ہربہاآ بدعنوانی نا چٹفنگ المی ئِ۔ اوپارے کہ بدعنوانی و واک آتا ناروا کاریم اٹ اتنگ اہم ئُ چیلنج ئُ ، بابائے قوم قائد اعظم محمد علی جناح آئین ساز اسمبلی نا اولیکو دیوان اٹی قوم ئِ دابرائی تیان خبردار کریسس کہ”بدعنوانی و رشوت ستانی بھلو ناسور ئُ ہرافتیان ہندوستان زہمی مننگ ئِ۔ اوپارے کہ او دا پاپک کہ ایلو ملک آک داڑآن پاک ئُ ولے اونا خیال ئِ کہ ہراڑے حالیت آک خراب ئُ ، ننے اوڑتون آہنی دوتے اٹ مون تننگ نا گرج ئِ۔ اوپارے کہ کنے اومیت ئِ کہ نم داڑکن زوت آن زوت مناسب گام گیج کیرہ انتئے کہ دُن کننگ دا اسمبلی نا کمک اٹ ہی مننگ کیک۔ “ چیئرمین نیب پارے کہ راج انا غٹ تپہ خاص کر ورناتے بدعنوانی نا برخلاف یکجا مننگ نا گرج ئِ۔ اوفتے ملک آن بدعنوانی نا توننگ کن انسداد بدعنوانی نا ادارہ غاتون بایدے پورو کمک کیر۔ یونیورسٹی و کالج آتیٹی پوسکن آ نسل ئِ بدعنوانی نا خراب انگا زئم تیان معلومدار کننگ کن آگاہی مہم اس بایدے بناءکننگے۔ اوپارے کہ نیب پاکستان اٹی بدعنوانی نا توننگ نا بڑزکو ادارہ ئِ۔ اوپارے کہ نیب پاکستان ئِ بدعنوانی آن پاک ملک اس جوڑ کننگ کن پوروی وڑاٹ پرعزم ئِ۔
