اسلام آباد۔ 28 فروری (اے پی پی) پاکستان مسلم لیگ (ن) نا راہشون طلال چوہدری پارینے کہ حنیف عباسی نا پٹیشن آن پد عمران خان نا حقیقت قوم آ پاش مریک، ایلوفتیان حساب خواﺅک آتون تینا اولاد، جائیداد و تینا باوہ نا حساب ہم اف، محمد نواز شریف پاکستان نا شونداری نا پہیہ ئِ سلفنگ کن ہلیپک و ہرہموکاریم ئِ کیک ہرا پاکستان نا شونداری نا مریک۔ سے شنبے آ داڑے میڈیا تون ہیت وگپ اٹی اوپارے کہ سپریم کورٹ اٹی دُدینگ دُدینگسا دوبہ خلوک آ عمران خان نا ورندی تننگ نا دے بسنے، عمران خان نا وکیل داسہ نرسا و بچسا چرینگ انگ ئِ کہ حنیف عباسی صاحب نا پٹیشن نا تاریخ لگپ انتئے کہ دا پٹیشن نا تاریخ لگنگ آن پد عمران خان قوم انا مون آ عیاں مریک۔ طلال چوہدری پارے کہ ایلوفتیان حساب خواﺅک آ عمران خان تون تینا اولاد، جائیداد و تینا باوہ نا حساب ہم اف۔ اوپارے کہ داکیس انا سماعت آن پد عمران خان ارٹ چار سال آخا سد سال اکن نابود مریک ۔ اوپارے کہ عمران خان ئِ بایدے مرے کہ او تینا اولاد ، بنی گالہ ، بال ٹیمپرنگ ، جوہا و سول نافرمانی نا کال ناحساب ایتے، نن نے آن حساب ہلنگ کن بسونن اگہ نی دُزی کتنوس تو تلاشی انت اکن تفیسہ۔ سپریم کورٹ و الیکشن کمیشن آن انت اکن نرنگ ئِ۔ طلال چوہدری پارے کہ وزیراعظم محمد نواز شریف ہچ ئُ استثنیٰ اس دوئی کتنے۔ اوتینا ایماندار باوہ ، چناو تینا مسہ نسل آتے عدالت نا مون آ پیش کرینے۔ ننے آن اگہ ہفتاد سال انا حساب ئِ خوائنگے تو اودے ہم ایتنہ۔ اوپارے کہ میاں نواز شریف نا ضد ئِ کہ او پاکستان نا شونداری نا پہیہ ئِ توننگ کن ہلیپک و ہر ہموکاریم ئِ کیک ہرا پاکستان نا شونداری نامریک۔ اوپار ے کہ داسہ عمران خان نا باری ئِ ، عمران خان آن گدرینگوک آ پنچ سال انا حساب ئِ خوائسونن اوداحساب ئِ ہم تفننگ ئِ ، نن عمران خان نا اصل دروشم ئِ قوم ئِ نشان ایتنہ۔
