اسلام آباد ۔25فروری (ا ے پی پی ) تہی کارانی وزیر چوہدری نثار علی خان ئَ گشتگ کہ ناشرکارءُ آھانی تنظیم سرجمئَ بلیک لسٹ کنگی اَنت۔ ھال در اُلسئَ اثر مندیں توار ئَ سرکنگئَ کمک بہ کنت۔ ھا ل در اُلسئَ را گیش جزم ئِ مارشت ئَ بہ دنت، دلپروشی ءُ تُرس ئَ را دور بہ کنت ءُ اُلس ئِ تہا یکوئی پیداک کنگئِ ھوالگ ئَ ھا ل درئَ را وتی کرد پیلو کنگ لوٹ ایت۔ شمبے ئِ روچئَ ھال درئِ گوما گپ ءُ تران کنانئَ تہی کارانی وزیر ئَ گشتگ کہ گوستگیں ساڑھے سئے سالانی تہا سکیورٹی ئِ جاورھال ئِ تہا باز جوانی اَتکگ ءُ جون 2013ئِ رپورٹس ئِ ردئَ پاکستان ئَ روچے شش، ھپت تراک بوتگ ءُ سالے تراکانی کساس 2ہزار ئَ چہ گیش بوتگ۔ آئی ئَ گشتگ کہ پاکستانئَ مدام تراک بوتگ بلے ھال شنگ نہ بوتگ اگاںکم تراک بوتیں گڑا ھال شنگ بوتگ ۔ آئی ئَ گشتگ کہ گوستگیں سالانی تہا 2006ءَ پد اولی رند ئَ یک ہزار ئَ چہ ھم کم ھپت سد ئِ نزیک ئَ تراک ریکارڈ کنگ بوتگ اَنت ءُ ناشرکاری کاروائی آنی میاں اوستمانی ریکارڈ ایر کنوکیں ادارگ اے گپءَ را من اَنت۔ آئیئَ گشتگ کہ حکومتئِ نیمگئَ چہ کتگیں گامگیجانی برکت ئَ امنءُ ایمنی ءِ جاورھال ئِ تہا گہتری اتکگ ۔
