ملخ آتا برخلاف آپریشن، 24 گھنٹہ ٹی 3 لکھ 46 ہزار ایکڑ رقبہ ناسروے، 8700 ایکڑ آ اسپرے کننگا، ترجمان این ڈی ایم اے

اسلام آباد۔ 09 جون (اے پی پی) مچ آ ملک اٹی ملخ آتا برخلاف آپریشن نا رداٹ تدوک آ 24 گھنٹہ ٹی 3 لکھ 46 ہزار ایکڑ رقبہ نا سروے وخت اس کہ 8700 ایکڑ رقبہ غا ملخ آتے تلف کننگ کن اسپرے کننگا، داوخت آ پنجاب نا اسہ علاقہ سے آن ہم ملخ رپورٹ متنے۔ نیشنل ڈیزاسٹر مینجمنٹ اتھارٹی نا ترجمان نا رداٹ داوخت آ ملک انا 46 ضلع غاتے ٹی ملخ آک ساڑی ءُ۔ بلوچستان نا 33، خیبرپختونخوا 8، و سندھ انا 5 ضلع غاک زہمی ءُ۔ بلوچستان اٹی خضدار، آواران، نوشکی، چاغی، گوادر، اوتھل، کیچ، پنجگور، خاران، واشک و کوئٹہ غان بیدس ایلو ضلع و کے پی ٹی ڈیرہ اسماعیل خان، ٹانک، سویلی وزیرستان، لکی مروت، کرک، کرم، اورکزئی و خیبر نا ضلع غاک زہمی ءُ۔ سندھ اٹی خیبرپور، سکھر، شہید بے نظیر آباد، مٹیاری و جامشورو ٹی ملخ آتا جلہو مس۔ تدوک آ بیست ءُ چار گھنٹہ ٹی پنجاب نا اسہ علاقہ اسے ٹی ہم ملخ رپورٹ متنے۔ ملخ آتا زہمی علاقہ غاتا سروے و کنٹرول آپریشن برجاءِ۔ 1119 ٹیم لوکسٹ کنٹرول آپریشن اٹی بشخ ہلکر۔ تدوک آ 24 گھنٹہ ٹی 3 لکھ 46 ہزار ایکڑ رقبہ نا سروے مس وخت اس کہ 8700 ایکڑ رقبہ غا ملخ آتے تلف کروک آ دوائی اسپرے کننگا۔ بلوچستان اٹی 7600 ایکڑ رقبہ و خیبر پختونخواٹی 600ایکڑ رقبہ نا ٹریٹمنٹ مس۔ سندھ اٹی تدوک آ دے 500 ایکڑ رقبہ نا ٹریٹمنٹ ءِ کننگا۔ داوخت اسکان مچ آ ملک اٹی 5 لکھ 38 ہزار 100 ایکڑ رقبہ غا اسپرے کننگانے۔ پشین اٹی 170 ایکڑ رقبہ غا ہوائی جہاز انا کمک اٹ کیمیائی اسپرے کننگا۔