ایس او پی تا خلاف ورزی کروک آتا برخلاف سخت کارروائی کننگک، پارلیمانی سیکرٹری نیشنل ہیلتھ سروسز ڈاکٹر نوشین حامد

اسلام آباد۔ 09 جون (اے پی پی) پارلیمانی سیکرٹری قومی جان جوڑی نا خذمت ڈاکٹر نوشین حامد پارینے کہ حکومت ہمو غٹ مخلوق نا برخلاف سخت کارروائی کیک ہراکوروناوائرس نا تالانی ءِ توننگ کن ایس اوپی تا خلاف ورزی ءِ کیرہ۔ تیناانٹرویو ٹی اوپارے کہ الس کوروناوائرس نا تالانی ءِ سنجیدگی اٹ ہلپننگ ءُ، و ہرتدوک آ دے اتون کوویڈ۔ 19 آن زہمی بندغ آتے ٹی ودکی مننگ ءِ و اگہ حالیت آک ہنداوڑ مسر تو حکومت ءِ سخت لاک ڈاؤن کروئی تمک۔ اومستی پارے کہ حکومت ایس اوپی تا نافذ کننگ ءِ پک کننگ کن چندی گام گیج کرینے و دا پارت آتیا عملدرآمد ءِ باقاعدگی اتون مانیٹر کننگک۔ اوپارے کہ ایس او پی ایس نا خلاف ورزی کننگ اٹ ہراکہ بندغ اوار مریک اودے سزا و جرمانہ ہم کننگک۔ اومستی پارے کہ کوویڈ۔ 19 اسہ جہانی ءُ ویل اس جوڑ مسنے و اودے جان جوڑی نا پیشہ ور بندغ آتا کنڈآن جاری کروک ایس او پی تیا عمل کرسا کنٹرول کننگ مریک۔ اسہ سوج اسے نا ورندی ٹی اووضاحت کرے کہ پاکستان ساڑی حالیت آتے ٹی پورو لاک ڈاؤن کننگ کپک و داہیت انا گرج ءِ کہ مخلوق ءِ تعلیم تننگے و اوفتے کوویڈ۔ 19 نا تالانی نا مون ءِ توننگ تون آگاہی فراوان کننگے تانکہ او تینا کاروباری سرجز آتے ہم کننگ کیر۔ اوپارے کہ غٹ کوروناوائرس نا تالانی ءِ توننگ کن رکھی گام گیج آتیا عمل کیر۔ اومستی پارے کہ راجی مری، وار وار دوتے سلنگ و ماسک بیننگ آن مخلوق ءِ دا دینی مرض آتیان بچفنگ اٹ کمک ملنگ کیک۔ اومشورہ تس کہ جان جوڑغذا کُننگ و قوت مدافعت اٹ ودکی آن مخلوق ءِ ترندی اٹ دراخہ جوڑ مننگ اٹ کمک ملنگ کیک۔