احساس کیش ریلیف پروگرام نا رداٹ سندھ انا حقدار تپہ ءِ 18 ارب روپئی تننگانے، وزیر مملکت موسمیاتی بدلی زرتاج گل

اسلام آباد۔ 09 جون (اے پی پی) وزیر مملکت موسمیاتی بدلی زرتاج گل پارینے کہ داوخت آ ہڑدڑ تالان کننگ نا اف بلکن قوم ءِ احتیاط نا گرج ءِ، سندھ اٹی پیپلزپارٹی نا حکمت بھاز بے وڑ فیل مسنے، ہموڑے ڈاکٹر و ایلو طبی عملہ ءِ بے آسرا ہلنگا، بلاول بھٹو زرداری ہژدہ می ترمیم آ بایدے ٹیوشن ہلے تانکہ او لاعلمی نا دنیا غان پیشن گام ءِ تخنگ کے، احساس کیش ریلیف پروگرام نا رداٹ سندھ انا حقدار تپہ ءِ 81 ارب روپئی تننگانے۔ ٹویٹر آ جاری بیان اٹی زرتاج گل پارے کہ داوخت آ ننے احتیاط کننگ نا گرج ءِ و ہڑدڑ تالان کننگ قوم انا حق اٹ اف۔ اوپارے کہ زرگزران ءِ قلف اس خلسا اُراٹی تولفنگ اسہ وڑاسے ٹی ہم سہی ءُ حکمت عملی اس اف، غٹ ملک آک تینا زرگزران تے ملنگ ءُ انتئے کہ مخلوق نا کٹیا و کاروبارنا گرج ءِ۔ زرتاج گل پارے کہ بدلینگوک آ حالیت آتون حکومت مربوط ءُ حکمت عملی اس جوڑ کننگ ءِ۔ کس اسے شیف خلنگ بھاز آسان ءِ ولے ہرا معصومانہ ایسری ءِ حزب اختلاف نا کنڈآن پاننگ انگ ءِ او زرگزران نا پہیہ ءِ پورو جام کننگ آن بیدس پین ہچ اس تفسہ۔اوپارے کہ بلاول زرداری دعویٰ تا برخلاف، کورونا نادین آ کنٹرول نا باندات اٹی ڈبینگوک آ سیاست ءِ چمکائفنگ اٹ لگوک ءِ، ولے سندھ انا کودک الس کن تدوک آ ہشت سال اٹی جان جوڑی کن بنجا نا کنڈآن تروک آ پنچ ءُ نیم کھرب روپئی ءِ خبراف ہراڑے سرکننگانے؟اوپارے کہ سندھ اٹی پیپلزپارٹی نا حکمت بھاز بے وڑ فیل مسنے ہموڑے ڈاکٹر و ایلوطبی عملہ ءِ بے آسرا ہلار و پریس کانفرنس آتیٹی اوفتا راہشونک کسہ و شگوفہ یلہ کرسا کیرہ۔ اوپارے کہ بنجائی حکومت داوخت اسکان احساس کیش ریلیف پروگرام نا کمک اٹ سندھ انا حقدار تپہ ءِ 81 ارب روپئی تسنے و ملخ آتا باندات اٹی ہم بنجا بھلو امداد اس کرینے و معاملہ ءِ تینا دوٹی ہلک وخت اس کہ ہژدہ می ترمیم آن پد دا صوبائی حکومت آتا زمواری مسکہ۔ اوپارے کہ بلاول بھٹو زرداری ہژدہ می ترمیم آ ٹیوشن ہلے تانکہ او لاعلمی نا دنیا غان پیشن گام تخنگ کے۔