کوروناٹیسٹ اکن مچ آ ملک اٹی 102 لیبارٹری کاریم کننگ ءُ، نیشنل کمانڈ اینڈ آپریشن سینٹر نا دیوان اٹی حوال

اسلام آباد۔ 09 جون (اے پی پی) کورونا نا دین انا چٹفنگ کن نیشنل کمانڈ اینڈ آپریشن سینٹر (این سی او سی) ٹی میٹنگ اس اڈتننگا ہراٹی بشخ ہلوک آتے پاننگاکہ کورونا نا ٹیسٹ اکن داوخت آ مچ آ ملک اٹی 102 لیبارٹری کاریم کننگ ءُ۔ داکان بیدس فورم اٹی فرنٹ لین آ دادینی مرض انا برخلاف مون تروک ہیروتیکن است بڈ پیکج و جون /جولائی ٹی دا دین انا برخلاف ودکی گرج آتا ہم جاچ ءِ ہلنگا۔ ایس او پی تیا عملدرآمد کپننگ و راجی فاصلہ غاتا خلاف ورزی کننگ آ مچ آ ملک انا طول و عرض اٹ جوڑ کروک آ صوبائی ٹیمک مارکیٹس، صںعت، ٹرانسپورٹ و وائرس نا گمانی تالان مروک آ جاگہ غاتیا آپریشن کریر۔ تدوک آ 24 گھنٹہ ٹی کارروائی تیٹی بلوچستان اٹی 961 خلاف ورزی خننگا ہرانا سوب آن 250 دوکان و 92 گاڈی تے عارضی وڑاٹ بند و جرمانہ کننگا۔ پنجاب اٹی چندی مارکیٹ، بازار، ٹرانسپورٹ و صنعتی علاقہ غاتا ہُننگ کن خصوصی ٹیم ٹہیفنگا و ایس او پی تا خلاف ورزی تیا 769 دوکان 8 صنعت 776 گاڈی تے عارضی وڑاٹ بند و جرمانہ کننگا۔ ہنداوڑاٹ سندھ اٹی دوکان تے بند کننگ و ٹرانسپورٹ تون اوار سخت کارروائی مچ آ سندھ اٹی ایس او پی تا خلاف ورزی کروک آتا برخلاف کننگا۔ خیبرپختونخوا ٹی ایس او پی تا 7351 خلاف ورزی کننگا ہراٹی 302 دوکان و 221 گاڈی تے بند و جرمانہ کننگا۔ وخت اس کہ 1933 مخلوق ءِ جرمانہ کننگا۔ گلگت بلتستان اٹی ایس اوپی تا 270 خلاف ورزی نا پیدواری ءِ کننگا ہراٹی 67 دوکان و 70 گاڈی تے جرمانہ و عارضی بند کننگا۔ آزاد کشمیر اٹی 422 خلاف ورزی تیٹی 112 دوکان و 85 گاڈی تے جرمانہ و عارضی بند کننگا۔ ہنداوڑاٹ اسلام آباد اٹی ایس اوپی تا 101 خلاف ورزی تیٹی 13 ہوٹل، 24 دوکان و 85 گاڈی تے بند و سِیل کننگا۔