اسلام آباد۔ 05 جون (اے پی پی) وزیراعظم نا سلاہکار خزانہ ومحصولات ڈاکٹر عبدالحفیظ شیخ پارینے کہ حکومت کاروبار اٹی آسانی و گچین و مسابقتی چاگڑدنا فراوانی نا کمک اٹ ملک اٹی کاروبار ءِ مون آ دننگ کن گام گیج کننگ ءِ۔ اوداخیال آتا درشانی ءِ پاکستان کاٹن جنرزایسوسی ایشن آل پاکستان ٹیکسٹائل ملز ایسوسی ایشن نا عہدیدار، آئی پی پیز وملکی شربت جوڑ کروک صںعت نانمائندہ غاتون جتا ویڈیوزوم دیوان تیٹی کرے۔ وزیراعظم نا سلاہکار واپار عبدالرزاق داؤد، چیئرپرسن ایف بی آر نوشین جاوید امجد و وزارت خزانہ نا سینئر آفیسر آک ہم داوخت آ ساڑی ئسر۔ اوڑدہی تیٹی تعلقدار بشخ آتا نمائںدہ غاک تینا بشخ آتے ٹی مون تروک مشکل آتیان معلومدار کرے۔ ڈاکٹر عبدالحفیظ شیخ پارے کہ حکومت کوروناوائرس نا سوب آن زرگزران نا چندی بشخ آتے مون تروک ویل آتیان جوانی اٹ بلد ءِ دا مشکل آتا چٹفنگ کن غٹ جامع گام گیج کننگ انگ ءِ، حکومت 1200 ارب روپئی آن زیات کمکی پیکج نا ہم پڑو ءِ کرینے ہرانا بنداوی مسخت کاروبار و زرگزران ءِ جان جوڑ چاگڑد نا فراوانی نا کمک اٹ بحالی نا کسر آ روان کننگ نا ءِ۔ کاروبار نا مون آ دننگ و زرگزران نا بحالی کن حکومت خراج تیٹی کمتی کرینے وخت اس کہ ودوکی کن جامع ترغیبات تننگانے۔ اوڑدہی تیٹی خراج آتے ٹی ممکنہ کمتی، ری فنڈز انا ادائیگی و کاروبار ءِ کیش انا فراوانی تون اوار چندی سلاہ و سفارشات ہم پیش کننگا۔ ڈاکٹر عبدالحفیظ شیخ ڈل آتے جائز ویل آتا ایسری نا باوری کرفے۔ اوچندی نمائندہ غاتا پیدواری آ ری فنڈز انا ادائیگی و ایلو ویل آتا ایسری کن چیئر پرسن ایف بی آر ءِ پارت ہم جاری کرے۔
