شہباز شریف تینا نروک آ ایلم نا ضامن ءِ، او مخلوق نا ذاتیات آ بیان بازی آن پاناد کے و تینا کرپشن نا حساب ءِ ایتے
اسلام آباد۔ 05 جون (اے پی پی) وزیراعظم نا خصوصی کمکار پولیٹیکل کمیونیکیشنز ڈاکٹر شہباز گل پارینے کہ تحریک انصاف اولیکو وار شیفکو تپہ غان ہم السی نمائندہ غاتے مون آ بننگ نا موقع تس، وزیراعظم پورٹل آ 22 لکھ غاو رسینگانے۔آخبت وزیراعظم سیٹیزن پورٹل نا ماہانہ رپورٹ ءِ پیش کینہ، داوخت اسکان بے پناہ اہمیت نا حامل 28 ہزار 118 غاو تا ازالہ مننگ کتنے ہرافتے ٹی غٹ آن زیات غاو سندھ انا ادارہ غاتا بارواٹی ءُ، شہباز شریف مخلوق نا ذاتیات آ بیان بازی آن پاناد کے و تینا کرپشن نا حساب ایتے۔ ننے داہم معلوم ارے کہ شہباز شریف تینا نروک آ ایلم نواز شریف نا ضامن ءِ، پیپلزپارٹی نا گیشتر سرکڑدہ راہشون تیا کرپشن نا سنگین دوبہ غاک ءُ۔ داخیال آتا درشانی ءِ او جمعہ نادے آ پی آئی ڈی ٹی پریس کانفرنس آن تران کرسا کرے۔ داوخت آ قومی اسمبلی نا باسک صداقت عباسی و کنول شوزب ئسک اوڑتون اوارئسر۔ شہباز گل پارے کہ داوخت آ ملک اٹی ہندن ءُ حکومت اسے ہرا سیاست تون اوار ہر بشخ اٹی شیفکو تپہ نا مخلوق ءِ تینا بریبر اتنگ نا موقع تس۔ اوپارے کہ اینو کنا پریس کانفرنس نا بنداوی مسخت وزیراعظم نا سیٹیزن پورٹل نا بارواٹی الس ءِ معلومداری فراوان کننگ نا ءِ۔ داوخت اسکان پورٹل آ 21 لکھ غاو رسینگانو ہرافتے ٹی 94 درسد آن زیات ملکی شاری، 5.5 درسد غاو اوورسیز پاکستانی و 0.32 درسد غاو درملکیک کرینو۔ پورٹل آ غاو ملنگ آن پد اوفتے 21 دے انا تہہ ٹی ایسر کننگ نا کوشست کننگک وپورٹل آ 7 ءُ نیم ہزار محکمہ غاتا برخلاف غاو کننگک و دا 21 دے انا تہہ ٹی ایسر مفس تو تعلقدار محکمہ غاتے الرٹ جاری کننگک و اوفتے 41 دے انا تہہ ٹی غاوتا ازالہ کن ٹائم تننگک اگہ 41 دے انا تہہ ٹی ہم غاوتا ازالہ مننگ کپ تو اوفتے بے پناہ اہمیت نا حامل گوندنگک۔ اوپارے کہ داوخت اسکان ملوک آ غاوتیان 28 ہزار 118 غاوتے بے پناہ اہمیت نا حامل (سپرایسکیلیٹڈ) گوندنگانے۔ ہرافتیان خیبر پختونخوا غان 1557، پنجاب آن 2065، بلوچستان آن 583، بنجائی دارالحکومت آن 5086 ملانو ولے سندھ آن بے کچ اہمیت نا حامل غاوک 17096ءُ ہرافتے ٹی 6 ہزار غاو بنجائی ادارہ غاتا برخلاف وخت اس کہ ایلو غٹ غاوک سندھ انا ادارہ غاتا برخلاف ءُ۔ اوپارے کہ اگہ داوخت اسکان نن 10بے است جم ادارہ غاتا بارواٹی پان تو اوفتے ٹی 8 ادارہ غاتا تعلق صوبہ سندھ آن ءِ و و اگہ ہمو ادارہ غاتا باروٹی پان ہرافتیان الس است جم ءِ تو اوفتے ٹی سندھ انا اسہ ادارہ اس ہم اوار اف۔ ڈاکٹر شہباز گل پارے کہ شہباز شریف نا کنڈآن بورہ نا بابت ہڑدے پوسکن ءُ بیان مون آ بریک، ای اودے پاننگ خواوہ کہ بورہ غا 29 ارب نا تروک آ سبسڈی آن 27 ارب نی تسونس و شہباز شریف ءِ دا ہم پاننگ خواوہ کہ نیب اٹی کرامت مسیح نما چاری ءِ ، اونا اکاؤنٹ اٹی نی ہرا پیسہ غاتے ٹرانسفر کریسس اوفتے ہن ہڷ ومیاں شہباز شریف نا مار، ایلم نا مار، سالم و ایلم نا سمدھی نروک ءِ و نی ایلم ءِ ہم 50 روپئی نا اسٹام آ نرفینس و نی عدالت اٹ اونا ضاٰن مسونس۔ داوخت آ باسک قومی اسمبلی صداقت عباسی پارے کہ زرداری خاہوت و اونا حواریک سندھ اٹی کرپشن نا بازار ءِ گرم کرینو۔ مراد علی شاہ ، ڈاکٹر عاصم، شرجیل میمن، آصف علی زرداری، بلاول بھٹو تون اوار چندی مخلوق کرپشن کنگ مسنو و وزیراعظم سیٹیزن پورٹل آ غٹ آن زیات غاو سندھ انا ادارہ غاتا بارواٹی ءُ۔
