الس ءِ را کورونا وائرس ءِ ھوالگ ءَ سرپدی پجاری کنگ ءِ واستہ والنٹری کار کنوک آنی ضلورت انت، ایس او پیز آنی پد ءُ رند کنائینگ ٹائیگر فورس ءِ زمہ واری آنی تہ ءَ ھوار انت، ٹائیگر فورس ءِ والنٹری کارندہ آناں کاٹ جاڑی کنگ بیت، مزن وزیر عمران خان ءِ کارونا ٹائیگر فورس ءِ والنٹری کار کنوکیں مردم آناں گشتانک

اسلام آباد ۔ 5 جون (اے پی پی) وزیراعظم عمران خان ءَ گوشت کہ الس ءَ را کورونا وائرس ءِ ھوالگ ءَ سرپدی پجاری کنگ ءِ واستہ والنٹری کار کنوک آنی ضلورت انت۔ ایس او پیز آنی پد ءُ رند کنگ ٹائیگر فورس ءِ زمہ واری آنی تہ ءَ ھوار اتن، ٹائیگر فورس ءِ والنٹری آناں کاٹ جاڑی کنگ بیت، ٹائیگر فورس مہنگائی ءُ امبار آں چیر دیوک آنی گر ءُ دار ءِ وستہ توامیں مالوم داری دنت انت، مدگ ءِ ھلای ءِ واست ھم ٹائیگر فورس ءِ والنٹری کار کناں، کلین اینڈ گرین پاکستان گامگیج ءَ ھم والنٹری کار کنوں وتی کرد ءَ ھم پیلو کناں، پاکستان گیش لاک ڈائون ءِ سر ءَ بوت نہ کنت، کورونا ءِ سبب ءَ ٹیکس ءِ 800 ارب کلدار ءِ کمی بوتگ، پیسرگیں حکومت ءِ وام آنی سود ءِ رد ءَ 5 ہزار ارب کلدار داتگ۔ بجٹ ءِ تیاری جاڑی انت، ھرچ ءُ درچ آنی تہ ءَ گیش کمی بیت۔ آئی ءَ اے ھیالانی درشانی آدینگ ءِ روچ ءَ ادا کورونا ٹائیگر فورس ءَ گوں گشتانک دیان ءَ کت۔ اے موہ ءِ سر ءَ بنجاھی وزیر اھوالکاری سینیٹر شبلی فراز، مزن وزیر ءِ ھاسیں کمکار برائے ورنا آنی کار عثمان ڈار ءُ مزن وزیر ءِ ھاسیں کمکار شہباز گل ھم اے موہ ءِ سر ءَ ساڑی ات۔ مزن وزیر ءَ گوشت کہ دگنیا ءِ ایندگر ملک آں کورونا وائرس ءَ چہ سک باز جان تاوان بوتگ بلے پاکستان ءَ گوستگیں سئے ماہ ءَ چہ اپوسوزی ءِ سر ءَ گوشاں کہ 1700 ءَ چہ 1750 مردم بیران بوتگ ءُ مارا اے زانت ءُ زانش ھم رستگ کہ گیشتر مردم بیران بیت۔ کورونا وائر س ءِ گر ءُ دار ءِ واستہ مارا کورونا ٹائیگر فورس ءِ والنٹری کارکنوک آنی ضلورت بیت۔ آئی ءَ گوشت کہ کورونا ءِ سبب ءَ ٹیکس ھشت ارب کلدار کم بوتگ، گوستگیں حکومت آنی وام آنی سوتت ءِ رد ءَ پنچ ہزار ارب کلدار داتگ، بجٹ ءِ تیاری کنگ بوھگ ءَ انت، ھرچ ءُ درچ آنی تہ ءَ گیش کمی کنگ بیت۔ مارا وتی آمدنی گیش کنگی انت، جوڑیشت ءِ شوبگ ءُ کارخانہ پچ کنگ ءِ مول ءُ مراد ھمیش انت کہ مردم آناں روزگار بہ رس ایت، لاک ڈائون ءَ چہ امیریں مردم آناں اچ تاوان نہ رس ایت بلے گریب، ءُ بزگریں مردم ءُ پگار داریں تبک ءِ مردم ایشی ءَ چہ آماچ بنت۔ احساس پروگرام ءِ چیر دستی ءَ ما لی کمک ھم پجاری کتگ بلے سرجمیں رنگ ءَ اے کمک ءُ آسراتی پجاری کنگ نہ بیت۔ آئی ءَ گوشت کہ اگاں ٹائیگر فورس ءِ والنٹری کار کنوک ایو او پیز آنی پد ءُ رند بکنائین انت گڈا لاک ڈائون ءِ ضلورت نہ بیت ءُ کاروبار ھم پچ کناں۔ مزن وزیر ءَ گوشت کہ مئے ملک ءَ جوزگ ءُ شریں مردم آنی کمی نیست، مردم آنی جوزگ ءُ واھگ ءَ گندان ءَ منا سک باز وشی رستگ، راستیں کار دیم ءَ بندات بوھگی انت، ایشی ءِ واستہ مارا والنٹری کار کنوک آنی ضلورت کپ ایت۔