اسلام آباد۔ 04 جون (اے پی پی) کوروناوائرس نا ودوک آ رجحان نا رداٹ چیئرمین سینیٹ محمد صادق سنجرانی 5 جون آن بناکروک آ سینیٹ نا دیوان اکن وزارت جان جوڑی و جہانی ادارہ جان جوڑی نا کنڈآن جاری کروک ایس او پی تیا پورو عملدرآمد نا پارت کرینے و دیوان نا اڈتننگ کن گچین بست وبند آتا ہم پارت جاری کرینے۔ دابست وبند آتا رداٹ پارلیمان نا دیوان باقاعدہ وڑاٹ پاکستان ٹیلی ویژن نا کمک اٹ براہ راست نشر کننگک تانکہ میڈیا نا نمائندہ غاتے کوریج کن گیگ بدل ذریعہ اس فراوان کننگ مرے۔ میڈیا نا نمائندہ غاتیان خواست کننگک کہ دیوان ناکارروائی کن پی ٹی وی نا ٹرانسمیشن آن فائدہ ہرفر۔ چیئرمین سینیٹ پارے کہ دا حالیت بے کچ نازرک ءِ و گڑاس مشکل ءُ فیصلہ کروئی تمنگ ءِ۔چیئرمین سینیٹ پارے کہ نن اسُل دا حق اٹی افن کہ میڈیاو الس نا رسینگ نا کسر اٹ اڑاند مرین یا اوفتا رسینگ ءِ بند کننگے انتئے کہ میڈیا، پارلیمان، سول سوسائٹی و الس اسہ ایلو تون گنڈوک ءُ ولے کوروناوائرس نا سوب بھلو حالیت اس ودی مسنے ہرانا سوب آن بھلو فیصلہ کروئی تمانے۔ اوپارے کہ کنے اومیت ءِ کہ میڈیا و الس دا چرجوئی ٹی پبی کمک نا درشانی ءِ کیرہ تانکہ نن اسہ ایلو ءِ رکھ فراوان کننگ کین۔ چیئرمین سینیٹ داوخت آ الس آن ہم خواست کرے کہ او ہر جاگہ غا ایس او پی آ عملدرآمد کیر و کورونا غان بچنگ اٹ حکومت تون کمک کیر۔
