اسلام آباد۔ 04 جون (اے پی پی) اینخو مالی سال اٹی پاکستان اٹی کروک آ براہ راست درملکی زرکاری (ایف ڈی آئی ) ٹی 127 درسد ودکی مسنے۔ اسٹیٹ بینک آف پاکستان (ایس بی پی) نا رپورٹ نا رداٹ جاری مالی سال اٹی جولائی آن اپریل 2019-20 ء ٹی ملک اٹی 2.281ارب ڈالر نا ایف ڈی آئی کننگانے وخت اس کہ تدوک آ مالی سال انا ہندا وخت اٹی 1.006 ارب ڈالر نا براہ راست درملکی زرکاری کننگانے۔ ہنداوڑ تدوک آ مالی سال انا مقابلہ ٹی اینخو مالی سال اٹی ایف ڈی آئی ٹی 1.275 ارب ڈالر یعنی 127 درسد نا نمان ودکی ریکارڈ کننگانے۔ رپورٹ نا رداٹ اینخو مالی سال اٹی غٹ آن زیات زرکاری الیکٹرسٹی و گیس سپلائی سیکٹر اٹی کننگا ہرا 350.1 ملین ڈالر نا مقابلہ ٹی جاری مالی سال اٹی 626.7ملین ڈالر اسکان سرمس۔ ہنداوڑ درملکی زرکاری دوئی کروک آ ارٹ میکو بھلا سیکٹر ٹیلی کمیونیکیشن رہینگانے ہراٹی جولائی آن اپریل 2019-20 ء ٹی 509 ملین ڈالر زرکاری کننگا وخت اس کہ تدوک آ مالی سال انا ہندا وخت اٹی 115 ملین ڈالر نا ایف ڈی آئی کننگاسس۔ ایس بی پی نا رداٹ تدوک آ مالی سال انا اولیکو 10 تُو اٹی دا اِرا بشخ آتے ٹی 450 ملین ڈالر نا زرکاری کننگاسس وخت اس کہ اینخو مالی سال انا ہندا وخت اٹی ہڑتوم آ بشخ آتے ٹی 1.136 ارب ڈالر نا زرکاری کننگانے۔ رپورٹ نا رداٹ کانڑ کنی نابشخ اٹی کروک آ براہ راست درملکی زرکاری ہم 218 ملین ڈالر نا مقابلہ ٹی 78 درسد نا ودکی آن 389 ملین ڈالر اسکان ودانے وخت اس کہ فنانس و انشورنس سیکٹر اٹی کروک آ ایف ڈی آئی 2.24 درسد نا کمتی آن 258.6 ملین ڈالر اسکان کم مسنے۔
