گچین کاری فہرست آتے ٹی نیاڑی ونرینہ ووٹرآتا نیام اٹ زیات پرخ انگا علاقہ غاتا پیدواری ءِ کننگ ناپارت
اسلام آباد۔ 03 جون (اے پی پی) الیکشن کمیشن گچین کاری فہرست آتے ٹی نیاڑی و نرینہ غاتا نیام اٹ یک و نیم کروڑ ووٹر آتا پرخ ءِ چٹفنگ کن نادرا غان سرجم آتے بٹنگا تانکہ پوسکن آ شناختی کارڈ دوئی کروک آتا گچین کاری فہرست اٹ اندراج ءِ کننگ مرے۔ داڑتون اوار چیف الیکشن کمشنر ہمو علاقہ غاتا پیدواری ءِ کننگ نا پارت کرے ہراڑے گچینکاری فہرست آتے ٹی نرینہ ونیاڑی تا نیام اٹ پرخ زیات ءِ۔ چارشنبے نادے آ داڑے دابابت چیف الیکشن کمشنر سکندر سلطان راجہ نا کماشی ٹی الیکشن کمیشن سیکرٹریٹ اٹی دیوان اس اڈ ہلک ہراٹی سیکرٹری الیکشن کمیشن و ایلو بڑزکو آفیسر آک بشخ ہلکر۔ ایڈیشنل ڈائریکٹر جنرل (جینڈرافیئر) گچین کاری فہرست آتے ٹی نرینہ و نیاڑٛی ووٹر آتا نیام اٹ سوا کروڑ ووٹر آتا پرخ انا بارواٹی سرجم حوال تس۔ چیف الیکشن کمشنر دا پرخ ءِ چٹفنگ کن نادرا غان ہموبندغ ہرافتے شناختی کارڈ جاری کننگانے، اوفتا سرجم آتے دوئی کننگ نا پرمان کرے تانکہ اوفتا دمدستی گچین کاری فہرست آتے ٹی اندراج ءِ پک کننگے۔ چیف الیکشن کمشنر نادرا و ایلو تعلقدار ادارہ غاتون اواری اٹ گچین کاری فہرست آتے ٹی نرینہ و نیاڑی ووٹر آتے ٹی پرخ انا سوب و ہندابڑزکو پرخ انا چٹفنگ کن جامعہ حکمت عملی اس ٹہیفسا دمدستی وڑاٹ داڑآ عملدرآمدءِ پک کننگ ناپارت جاری کرے۔ داکان بیدس چیف الیکشن کمشنر پرمان کرے کہ جینڈر ونگ و الیکٹورل ونگ زوت آن زوت ہموعلاقہ غاتا پیدواری ءِ کیر ہراڑے گچین کاری فہرست آتے ٹی نرینہ و نیاڑی ووٹر آتا پرخ زیات ءِ و ہمو علاقہ غاتے ٹی ہلہلہ ئی بنداو تیا دا پرخ انا چٹفنگ کن اسہ جوان ءُ لائحہ عمل اسے نا رداٹ کاریم نا بناءِ کننگے و داچرجوئی ٹی الس کن آگاہی مہم ءِ ہم پک کننگے۔
