شیل پاکستان، اٹک پٹرولیم و ٹوٹل پارکو ءِ 24 گھنٹہ ٹی ورندی جمع کرفنگ نا پارت
اسلام آباد۔ 03 جون (اے پی پی) آئل اینڈ گیس ریگولیٹری اتھارٹی (اوگرا) پٹرولیم مصنوعات آتا درکار کوڑی ءِ برقرار تخپننگ آ مسہ آئل مارکیٹنگ کمپنی تے نوٹس جاری کرینے۔ اوگرانا ترجمان عمران غزنوی چارشنبے نادے آ اسہ بیان اسے ٹی پارے کہ دا آئل مارکیٹنگ کمپنی تے نوٹس جاری کننگانے ہرافتے تون تیل انا درکار کوڑی الوکہ و دانا سوب آن ملک اٹی پٹرولیم مصنوعات آتا فراوانی ٹی ویل ودی مس۔ اوپارے کہ شیل پاکستان لمیٹڈ، اٹک پٹرولیم لمیٹڈ و ٹوٹل پارکو پاکستان لمیٹڈ ءِ 24 گھنٹہ ٹی ورندی جمع کرفنگ ناپارت کننگانے۔ سے شنبے نادے آ اوگرا 33 آئل مارکیٹنگ کمپنی تا چیف ایگزیکٹوز آتے نوشتہی وڑاٹ تینا پٹرول پمپ و کوڑی تیٹی پٹرولیم مصںوعات آتا دستیابی ءِ پک کننگ ناپارت کریسس۔ ہائیڈرو کابن ڈویلپمنٹ انسٹی ٹیوٹ آف پاکستان (ایچ ڈی آئی پی) چندی ہند آتیا پٹرولیم مصنوعات آتا دستیابی ءِ چیک کرے ہراٹی پٹرولیم مصنوعات آتا کوڑی کپننگ یا صارف آتے اوفتا دستیابی مفننگ نا بارواٹی معلومدار کننگا۔ ایچ ڈی آئی پی دا چرجوئی ٹی تینا بنائی رپورٹ ءِ جمع کرفینے ہراٹی دا گڑا مون آ بس کہ گڑاس کمپنی تتون پٹرولیم مصنوعات آتا وافر کوڑی ساڑی ئس ولے گڑاس کمپنی تتون پٹرولیم مصنوعات آتا کوڑٛی بے کچ کم خننگا ہرانا بارواٹی پٹرولیم ڈویژن ءِ ہم معلومدار کننگا۔ ایچ ڈی آئی پی نا رپورٹ اٹی پاننگاکہ آئل مارکیٹنگ کمپنی تا کنڈآن خواست انارداٹ پٹرول پمپ آتے وافر پٹرولیم مصنوعات فراوان کپننگ انگ ءِ۔ اوگرا پٹرولیم ڈویژن ءِ سلاہ تس کہ آئل مارکیٹنگ کمپنی تے پارت کننگے کہ او پٹرولیم مصنوعات آتا درکار کوڑی تا دستیابی ءِ پک کیر تانکہ ہچ وڑنا کاختی اس ودی مف۔ رپورٹ اٹی داہم پاننگانے کہ آئل مارکیٹنگ کمپنی تیان پٹرولیم مصنوعات آتا وخت آ درآمد نا بابت ہم آگاہی دوئی کننگے۔
