نیویارک۔ 03 جون (اے پی پی) اقوام متحدہ نا سیکرٹری جنرل انتونیوگوتریس نا موقف دادے کہ بھارت وپاکستان نا نیام اٹ بے چیٹی گمانی وڑاٹ ودکی نا سوب مروک آ گام گیج آتیان پاناد کننگے۔ داہیت ءِ اونا ترجمان بھارت نا کنڈآن کنٹرول لین نا وار وار آ خلاف ورزی تا بارواٹی چست کروک آ سوج انا ورندی ٹی پارے۔ نیویارک اٹی اسہ ورچوئل نیوز حوال اسے ٹی ترجمان سٹیفن دجارک اے پی پی نا اسہ سوج اسے نا ورندی ٹی پارے کہ سیکرٹری جنرل نا بنداوی کلہو مدام و ہرکڑدہ کن دادے کہ او بے چیٹی ٹی ودکی کروک آ ہروڑنا گام گیج آتیان پاناد کیر۔ پاکستان نا وزیر خارجہ شاہ محمودقریشی نا اقوام متحدہ نا سروک تون ساڑی آ رابطہ ہرافتے ٹی اودے مقبوضہ کشمیر نا بگڑینگوک آ حالیت، بھارت نا کنڈآن کنٹرول لین نا خلاف ورزی و ہڑتوم آ ملک آتا نیام اٹ بے چیٹی تے ودفوک آ ایلو گام گیج آتیان معلومدار کننگا بارواٹی سوج انا ورندی ٹی ترجمان پارے کہ پاکستان نا وزیر خارجہ شاہ محمود قریشی و اقوام متحدہ نا سیکرٹری جنرل انتونیوگوتریس تدوک آ ہفتہ ہیت وگپ کریسر و اونا مون تروک آ اسہ چھٹی اس اقوام متحدہ نا باسک ملک آتے گدریفنگانے۔ وزیر خارجہ شاہ محمود قریشی نا 21 مئی نا چھٹی متنازعہ ڈیہہ ٹی جہانی برادری ءِ ساڑی حالیت خاص وڑاٹ بھارت نا مقبوضہ جموں و کشمیر اٹی مسلم اکثریت ءِ اقلیت اٹ بدل کننگ نا مذموم کوشست آن معلومدار تخنگ کن پاکستان نا آخبتی سیاسی و سفارتی کوشست آتا بشخ اسے ہراٹی او‘‘دراندازی’’ نا نام نہا‘‘لانچ پیڈ’’ انا بھارتی دوبہ غاتے ہم مسترد کرینے۔ وزیرخارجہ شاہ محمود قریشی بھارت وپاکستان اٹی اقوام متحدہ نا ملٹری آبزرور پڑک ءِ بھارتی دعویٰ تا سُچائی نا پک کننگ کن مبینہ ہند آتا دورہ ءِ کرفنگ نا سلہ نا درشانی ءِکرے۔ اوپارے کہ پاکستان ءِ دوبہ دار گوندنگ نا اصل مسخت اسہ‘‘ دروغ فلیگ آپریشن ’’ اسے نا بہانہ ءِ کننگ ناءِ۔
