اسلام آباد۔ 02 جون (اے پی پی) احساس ایمرجنسی کیش انا چرجوئی ٹی منہ اہم پڑو کننگانے ہرافتا مسخت دا پروگرام اٹی اواربندغ آتا راہشونی ءِ کننگ نا ءِ تانکہ اوفتے مون تروک مشکل آتے دمدستی وڑاٹ ایسر کننگ مرے و اوہم تینا بشخ انا زر ءِ ہلنگ کیر۔ ذرائع نا رداٹ دا پڑوآتے ٹی پاننگانے کہ اگہ نما ہورتا نشان آتا بائیو میٹرک تصدیق مفننگ ءِ تو داسہ نم نادرا دفتر آتا ہِننگ آن بیدس تعلقدار بینک آتا پندار شاخ تیان کمکی زر ہلنگ کیرے۔ داوڑنا غٹ بندغ آتے امداد ہلنگ کن 8171 آن دُوارہ ایس ایم ایس گدریفنگک۔ دُوارہ بروک آ ایس ایم ایس اٹ تعلقدار بینک انا پن ڈس و نشان و تاریخ درج مریک۔ ایس ایم ایس نا ملنگ آن پد تعلقدار بینک اتون رجوع کیر۔ و زرتس اٹی آسانی کن شناختی کارڈ و موبائل فون ءِ تین تون اوار دیر۔ اگہ لمہ و باوہ، اَرے یا زائیفہ اہل ءُ و او کزیت کرینو تو داحالیت آتارداٹ خاہوت آتا آسراتی کن اپیل دائر کننگ نا وڑوڈول اس جوڑ کننگانے۔ ہراکہ 3 مرحلہ غاتیاٹی ءِ۔ تعلقدار یونین کونسل آن ایماندار نا پن انا کزیت سرٹیفیکیٹ اس دوئی کیر۔ ایماندار نا کزیت نا سرٹیفیکیٹ ءِ نادرا دفتر اٹ جمع کرفر۔ نادراغان ایماندار نا شناختی کارڈ نا تنسیخ/ کزیت نا پک سرٹیفیکیٹ ءِ تین تون ہرفسا بی آئی ایس پی نا تحصیل دفتر تون رجوع کیر۔ پین معلومداری کن ہیلپ لائن 080026477 آ رابطہ کننگ مریک۔ احساس ادائیگی ہند آتیا کوروناوائرس آن بچنگ کن ماسک بینر، دوتے سلنگ، جراثیم کش محلول و راجی فاصلہ نا پارت آتیا سختی اٹ عمل کننگے۔
