اسلام آباد ۔ یکم جون (اے پی پی) صدر مملکت ڈاکٹر عارف علوی ءَ راجی اسمبلی ءُ سینیٹ ءِ بجٹ دیوانانی درگت ءَ کورونا وبا ءَ چہ رکھگ ءِ ھاترا ایس او پیز ءِ سرا وڈ ءُپیم ءَ را سدکی دارگ ءِ سرا زور مان کنان ءَ گوشت کہ برزی ءُ جہلی ایوان ءِ دیوان ءِ درگت ءَ احتیاتی راھبند زورگ بنت۔اے ھیالانی درشان آہاں دوشمبے ءَ پارلیمنٹ ہاوس ءِ تروتاب ءِ موہ ءِ سرا کنان کتگ انت۔پارلیمنٹ ہاﺅس آھگ ءِ سرا سپیکر قومی اسمبلی اسد قیصر ءَ صدر مملکت ءَ را وش اتک کتگ۔ سیکرٹری قومی اسمبلی طاہر حسین ءَ صدر مملکت ءَ را بجٹ دیوان ءِ باروا بند ءُ بوج ءِ باروا سرپد کتگ۔صدر مملکت ءَ را گوشگ بوتگ کہ راجی اسمبلی ءِ گوستگیں دیوان ھم ایس اوپیز ءِ سرا وڈ ءُ پیم سدکی کنگ بوتگ ات وھدیکہ بجٹ دیوان ءِ تہ ھم بزنس ایڈوائزری کمیٹی ءِ تہ ہمہ ایس او پیز ءِ سرا شئور ءُ صلاح کنگ بیت۔ صدر مملکت ءَ گوشت کہ راجی اسمبلی ءِ بجٹ دیوان ءِ درگت ءَ کورونا وبا ءَ چہ رکھگ ءِ ھاترا احتیاتی راھبندانی سرا وڈ ءُ پیم ءَ را سدکی دارگ بیت۔باسکانی نیما سوشل ڈسٹنس ایر کنگ بیت، ماسک کنگ بنت ءُ دست بار بار شودگ بنت۔آہاں گوشت کہ مارا اے وبا ءَ گوں یک راج ءِ بستار ءَ مقابلہ کنگ ءِ ضلورت انت۔آہاں گوشت کہ مارا مہلوک ءُ دگنیا ءَ را اے کلوھ دیگ انت ءُ مہ وت ھم ایشی ءِ سرا وڈ ءُ پیم کنگ انت۔آہاں گوشت کہ پارلیمنٹ ءِ توکا ءُ ڈن ءَ میڈیا کوریج ءِ درگت ءَ ھم ایس او پیز ءِ سرا عملدرآمد ھاترا راھبند پدر کنگ بنت۔اے موہ ءِ سرا گپ ءُ تران کنان ءَ سپیکر بنجاہی اسمبلی اسد قیصر ءَ گوشت کہ کورونا وائرس ءِ باروا مہلوک ءِ تہ گیش سرپدی ودی کنگ ءِ ضلورت انت۔آہاں مزن وزیر عمران خان ءِ لاک ڈاﺅن ءِ تہ کمی ءِ پالیسی ءَ را ساڑان ءَ گوشت کہ مئے ملک ءِ مزنیں تبک ڈیلی ویجر انت ءُ آں لاک ڈاﺅن چہ باز سک آماچ بوتگ۔ملک مستر ءَ قومی اسمبلی ءِ ایوان ءِ ھم تروتاب کتگ۔ پدا صدر مملکت ڈاکٹر عارف علوی ءَ سینٹ ءِ ایوان ءِ ھم تروتاب کتگ۔ چیئرمین سینٹ محمد صادق سنجرانی ءُ وفاقی وزیر سینیٹر اعظم سواتی ءَ ایوان ءَ آھگ ءِ موہ سرا ملک مستر ءَ را وش اتک کتگ۔ چیئرمین سینٹ محمد صادق سنجرانی ءَ صدر مملکت ءَ را سینٹ ءِ بجٹ دیوان ءِ باروا بند ءُ بوج ءَ چہ سرپد کتگ۔ صدر مملکت ءَ دیوان ءِ تہ ایس او پیز سرا عملدرآمد سدکی دارگ ءِ پنت ءُ شون داتگ انت۔ صدر مملکت ءَ سینٹ لائبریری ءِ تروتاب ھم کتگ ءُ لہتیں کتابانی تہ جہلانکیں دلچسپی پدر کتگ۔
