اسلام آباد۔ 01 جون (اے پی پی) بنجائی وزیر حوالکاری وشینکاری سینیٹر شبلی فراز پارینے کہ جہانی کانود نا رداٹ پاکستانی ہائی کمیشن ءِ تینا سفارتی زمواری تا انجام تننگ آن توننگ و سفارتی عملہ نا دزگیری و بیدادی مذموم و بے کچ مذمت نا قابل ءُ حرکت اسے۔ بھارت ڈیہہ ٹی تینا غٹ ہمسایہ تا برخلاف جارحیت نا ڈوہدار ءِ۔ جہانی برادری بھارتی گام گیج آتا نوٹس ءِ ہلسا سفارتی و جہانی کانود آن چپ رویہ غا بھارت نا محاسبہ ءِ کے۔ داخیال آتا درشانیءِ او دوشنبے نادے آ تینا اسہ ٹویٹ اسے ٹی کرے۔ اوپارے کہ بھارت اٹی اقلیت خاص وڑاٹ مسلمان تے متعصبانہ و پرتشدد گام گیج آتا شست کروک آ آر ایس ایس جی جے پی حکومت نئی دہلی ٹی پاکستانی ہائی کمیشن نا عملہ غا بے بنداو و دروغ انا دوبہ غاتا مہم نا بناءِ کرینے۔ جہانی کانود نا رداٹ پاکستانی ہائی کمیشن ءِ تینا سفارتی زمواری تا انجام تننگ آن توننگ و سفارتی عملہ نا دزگیری و بیدادی مذموم و بے کچ مذمت نا قابل ءُ حرکت اسے۔ اوپارے کہ دا مہم نا مسخت تینا ڈوہ ءِ ڈکنگ، اقلیت آتا برخلاف جہانی بدنامی و رسوائی و مقبوضہ جموں و کشمیر اٹ کودک کشمیری تا برخلاف ریاستی دہشت گردی آن چکار ءِ اسہ کنڈ کننگ ناءِ۔ جہانی برادری بھارتی گام گیج آتا نوٹس ءِ ہلسا سفارتی و جہانی کانودی آن چپ رویہ غا بھارت نا محاسبہ ءِ کے۔ اوپارے کہ بھارت ڈیہہ ٹی تینا غٹ ہمسایہ تا برخلاف جارحیت نا ڈوہدار ءِ۔ بھارتی شرپسندی و توسیع پسندانہ سوچ چین کون آ ومن و شون پسند دوست ملک ءِ ہم سیم آ تینا فوج ءِ اتنگ آ بیوس کرینے۔ سینیٹر شبلی فراز پارے کہ نیپال نا بابت ہم ہنداوڑنا خبر میڈیا غا بننگ ءِ۔ مسلمہ جہانی تنازعہ جموں و کشمیر آ اقوام متحدہ نا سلامتی کونسل نا قرارداد و جہانی کانود نا پاش آن پاش خلاف ورزی ءِ کرسا بھارت نا کوزہ ٹی جموں و کشمیر اٹی اسہ کنڈی و غیر کانودی گام گیج بھارت نا برخلاف ڈوہ تا فرد جرم ءِ۔
