اسلام آباد۔ 01جون (اے پی پی) وزیراعظم نا سلاہکار واپار ٹیکسٹائل عبدالرزاق داؤد پارینے کہ حکومت ٹیکسٹائل، کشت وکشار و انجینیئرنگ تون اوار زرگزران نا غٹ بشخ آتیا اسہ وڑ چکار کننگ ءِ تانکہ بروک آ منہ تُو اٹی ملکی برآمد آتا لائخی ءِ ودفنگے۔ ’’اے پی پی‘‘ تون گپ وتران کرسا اوپارے کہ تدوک آ منہ تُو اٹی کوویڈ۔ 19 نا سوب آن برآمدآتا حالیت آک سہی متنو، اپریل 2020ء ٹی تدوک آ سال انا ہندا مد انا مقابلہ ٹی برآمد آتے ٹی 54 درسد کمتی بسنے۔ اوپارے کہ ملکی برآمد آتا مون آ دننگ کن گچین گام گیج کننگانے، برآمد آتے ودفنگ کن ’’میڈ ان پاکستان‘‘ پالیسی حکومت نا اولیت ءِ۔ اوپارے کہ دا بابت ایجنڈا کابینہ نا اقتصادی رابطہ کمیٹی (ای سی سی) تون ءِ، وزارت واپار صنعتی پیداوار اٹی ودکی کن بروک آ بجٹ اٹی ٹیرف سٹرکچر اٹ بدلی خواہک تانکہ میڈ ان پاکستان پالیسی ءِ سرسہب کننگ مرے۔ اوپارے کہ حکومت زرگزران نا غٹ بشخ آتیا اسہ وڑ چکار کرسا پیداوار اٹی ودکی کرسا برآمد آتے ودفنگ کن سنبرینگوک ءِ۔
