قوم جان تے ندرکروک آ ہیلتھ پروفیشنلز آتا منت وار ءِ، داننا ہیروک ءُ
اسلام آباد۔ 01 جون (اے پی پی) صدر مملکت ڈاکٹر عارف علوی پارینے کہ قوم تینا جان تا قربانی تروک آہیلتھ پروفیشنلز آتا منت وار ءِ، دا ننا ہیروک ءُ۔ اوفتا خذمت آتے امنا کننگ نا اسہ وڑوڈول دادے کہ نن ایس او پی تیا عمل کین، ماسک بینن، دوتے سلن و ہر جاگہ غا راجی فاصلہ تخن۔ دوشنبے نادے آ خیبر پختونخواٹی کوویڈ۔ 19 نا سوب آن ڈاکٹر اورنگزیب و ڈاکٹر محمد اعظم خان نا کزیت آ ہڑزخواہی و خاہوت آتون است ہسونی نا درشانی ءِ کرسا تینا ٹویٹ اٹی اوپارے کہ کوویڈ۔ 19 نا سوب آن نن ایوان صدر اٹ داوڑنا دود آتے یات کینہ ہرافتے ٹی چوری، تھیلیسیمیا غان زہمی چناک و ہنداوڑ راج انا ایلو گوجالوک آ تپہ ءِ بٹنگانہ۔ صدر مملکت پارے کہ دُن کہ نن دا دین اتون جنگ تننگ اُن۔ ننا عزم ءِ کہ اوفتے گیرام کپنہ۔ اوپارے کہ اگہ نن رکھی گام گیج اختیار کین و رابطہ غاتے ٹی ایس اوپی تیا عمل کین ولدا گڑانن کوویڈ۔ 19 نا دین ءِ شکست تننگ کینہ۔ اوپارے کہ دوتے سلنگ، ماسک بینگ و راجی فاصلہ تخنگ بھاز المی ءِ۔ اوپارے کہ دا دین اتون جنگ تروک آ ننا خواری کش مخلوق مشکل ءُ زند اس گدریفنگ ءُ۔
