پاکستان اقتصادی راہداری ڈٹ اٹی ترکی نا اوار مننگ نا خیرمقدم ئِ کیک، پرامن اوغانستان پاکستان و ڈیہہ نا فائدہ ٹی ئِ ، 2013ءنا مقابلہ ٹی 2017 ءٹی لوڈشیڈنگ نا حالیت اٹی نمان کمتی مس
انقرہ۔ 24 فروری (اے پی پی) وزیراعظم محمد نواز شریف پارینے کہ پاکستان اقتصادی راہداری ڈٹ اٹی ترکی نا اوار مننگ نا خیرمقدم ئِ کیک۔ پرامن اوغانستان پاکستان و ڈیہہ نا فائدہ ٹی ئِ، 2013ءنامقابلہ ٹی 2017 ءٹی لوڈشیڈنگ نا حالیت اٹی نمان کمتی مسنے، میڈیا ٹی خود احتسابی ہی مون آ ودنگ نا گچین ئُ کسر اسے، پاکستان نا غٹ سیاسی جماعت آک و راہشون آتے ملکی شونداری و شونہالی کن بایدے اواری اٹ کاریم کروئی مرے۔ داخیال آتا درشانی ئِ او ناشتہ غا صحافی تتون ہیت وگپ کرسا کرے۔ وزیراعظم پارے کہ پاکستان و ترکی نا نیام اٹ کمکاری ٹی بھاز پیش رفت مسنے، ترکی نیم ایشیائی ملک آتون اواری اٹ چین پاکستان اقتصادی راہداری ئِ شون تننگ کیک۔ وزیراعظم پارے کہ ننا آخبت نا وژن خنجراب آن چین، کرغزستان و قزاخستان اسکان نیامی ایشیائی ملک آتون رابطہ کننگ آ چکار ئِ۔ وزیراعظم پارے کہ ترکی نا صدر تون اوڑدہی ٹی شام، روس و داعش آن بیدس آزاد واپار نامعاہدہ و اقتصادی کمکاری تون اوار چندی معاملہ غاتیا سرجم خیال آتا درشانی مس۔ لاہور نا علاقہ گلبرگ اٹی دھماکہ نا بابت میڈیا نا کمک اٹ تروک آ غلط تاثر نا بابت سوج انا ورندی ٹی وزیراعظم پارے کہ دا بے کچ مثبت ئُ ہیت اسے کہ داوڑنا غیر زموارانہ رپورٹنگ نا برخلاف تینٹ میڈیا ٹی شرہ نا بناءمسنے انتئے کہ خوداحتسابی ہی مون آ ہِننگ نا گچین ئُ کسر اسے۔ اوپارے کہ2013ءنا مقابلہ ٹی 2017ءٹی لوڈشیڈنگ نا بابت صفا بدلی نا حالیت ساڑی ئِ۔ بجلی نالوڈشیڈنگ نا مریس وخت ئُ پاس بے کچ کم مسنے و صنعتی بشخ ئِ اونا طلب نا رداٹ بجلی فراوان کننگ انگ ئِ۔ وزیراعظم پارے کہ موٹروے اونا دور اٹی مہالو جوڑ جاڑ مسوسس و 10 سال آن پد اونا جوڑجاڑ نا گرج ئس ولے داڑآ مستین ٹی ہچ ئُ چکار اس تخنگ تو۔ اوپارے کہ 2013ءٹی حکومت برسراقتدار بننگ آن پد دُوارہ کاریم نا بنائِ کرے و موٹروے نا 13 ڈٹ آتیا کاریم جاری ئِ ہرافتیا 1100 ارب روپئی خڑچ مریک۔ پاکستان و اوغانستان نا تعلقداری نا بابت وزیراعظم پارے کہ نن اوغانستان نا خیر خواہ اُن و نن اسہ سوگو و پرامن اوغانستان ئس خوانہ انتئے کہ پرامن اوغانستان پاکستان و ڈیہہ نا فائدہ ٹی ئِ۔ وزیراعظم پارے کہ پشاور۔کابل موٹروے نا جوڑ جاڑ کن فزیبلٹی ناکاریم برجائِ وخت اس کہ پشاور۔جلال آباد شاہراہ آ 60 درسد شونداری کاریم پورو مسنے۔ اوپارے کہ نن اوغانستان نا شونداری ٹی کڑد ادا کننگ خوانہ انتئے کہ اوغانستان اٹی سوگوی ننا تینا سوگوی کن اہم ئِ۔ اسہ پین سوج اسے نا ورندی ٹی وزیراعظم پارے کہ پاکستان نا غٹ سیاسی جماعت و راہشون آتے ملکی شونداری و شونہالی کن بایدے اواری اٹ کاریم کروئی مرے۔
