کوئٹہ۔ 01 جون (اے پی پی) وزیراعلیٰ بلوچستان جام کمال خان نا کماشی ٹی دینی مرض آتون مون تننگ کن محکمہ جان جوڑی نا مجوزہ مسہ سالہ پروگرام نا جاچ دیوان اس اڈ ہلک ، سیکرٹری جان جوڑی دوستین جمالدینی پروگرام نا بابت دیوان ءِ حوال تننگا ، دیوان ءِ پاننگاکہ کوویڈ۔ 19 نا رداٹ جان جوڑی نا بشخ انا شونداری، تیاری و رسپانس پروگرام جون 2020 آن جون 2023 ء اسکان مریک، ہشت جزو آتیا تالان مسہ سالہ پروگرام آ خڑّچ انا کساس 13.33 ارب روپئی ءِ ، پروگرام آ عملدرآمد بنجائی حکومت و ڈونرز ادارہ غاتا شریداری اٹ کننگک، بلوچستان اولیکو صوبہ ءِ ہراکوروناوائرس آن پد دینی مرض آتون گچین وڑاٹ مون تننگ نا حکمت عملی اس تیار کرینے، پروگرام اٹی انسٹیٹیوٹ آف ویکسین ڈویلپمنٹ نا جوڑ کننگ ہم اوار ءِ، پروگرام اٹی دینی مرض آتون اوار اوار قدرتی آفت آتیان ودی مروک آ جان جوڑی نا چیلنج و ویل آتون مون تننگ ہم اوار ءِ، پروگرام اٹی میڈیکل لیبارٹری تے پوسکن آ وڑوڈول آتیا اتنگ ،دینی مرض آتیان بچنگ نا ویکسین نا تیاری شعبہ طب اٹ انسانی وسیلہ غاتا شونداری کوئٹہ و ڈویژنل ہیڈکوارٹرہسپتال آتا اپ گریڈیشن تون اوار ایلو اہم گام گیج آک اوار ءُ۔ داوخت آ تران کرسا وزیراعلیٰ بلوچستان جام کمال پارے کہ کوروناوائرس گلوبلائزیشن نا تصور و عمل ءِ ہم نسخان رسینگا و قوم تے اسہ ایلو آن مر کرینے ، دینی مرض آتون مون تننگ و درمان نا دریافت نا بابت ہر قوم داسہ پٹ وپول و ریسرچ نا کنڈآ متوجہ مسنے۔ ننے ہم ایلو قوم تیا سیبو ءِ کم کرسا طبی ریسرچ و پٹ وپول نا کنڈآ ہنوئی مریک۔ نجی بشخ انا بھلا طبی ادارہ غاتا است بڈی ءِ کرسا اوفتا آزموندہ غاتیان فائدہ ہرفوئی مریک۔ کوروناوائرس جان جوڑی نا بشخ اٹی پین زرکاری و پٹ و پول نا گرج تالان مسنے۔ اوپارے کہ کوروناوائرس دنیا نا جان جوڑی نا نظام ءِ سرفینے۔ کوروناوائرس راجی و زرگزرانی گرج رہن سہن و خور انا کاریم اٹ اتنگ نا بابت پوسکن آ تصور آتے ودی کرینے۔ لس بندغ جان جوڑی و رکھی گام گیج آتا بابت حساس مسنے۔ داوخت آ وزیراعلیٰ بلوچستان جام کمال سلاہ ئی جان جوڑی پروگرام ءِ بروک آ مالی سال نا شونداری پروگرام اٹ اوار کننگ نا پارت کرے۔
