اسلام آباد۔ 29 مئی (اے پی پی) وزیراعظم عمران خان جیل تیٹی بندی زالبول آتا حالیت نا جاچ ءِ ہلنگ کن کمیٹی اس جوڑ کرینے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ دا کمیٹی بنجائی وزیر انسانی حق انا کماشی ٹی جوڑ کننگانے وخت اس کہ سیکرٹری وزارت انسانی حق کمیٹی نا سیکرٹری مریک۔ کمیٹی ٹی سیکرٹری داخلہ، ہر چار آ صوبہ و گلگت بلتستان نا ہوم سیکرٹریز، ہر چار آ صوبہ و گلگت بلتستان ناجیل خانہ جات نا آئی جیزک اوار مریرہ۔ سارہ بلال و حیاء زاہد ءِ ہم کمیٹی نا باسک پن کننگانے۔ کمیٹی بندی زالبول آتون صنفی امتیازی و داڑتون تعلقدار باندات آتیا کاریم کیک و داویل انا ایسری کن ادارہ جاتی بست وبند سلاہ ایتک۔ بیان نا رداٹ کمیٹی نا چیئرپرسن ءِ بندغ اسے بطور باسک کمیٹی ٹی اوار کننگ نا اختیار مریک۔ کمیٹی جاچ ءِ ہلیک کہ انت زالبول بندی تا رکھ ، حق، جان جوڑی، سلامتی و راجی آسراتی نا بابت خاص کر و جیل انا قاعدہ و ضابطہ ، ضابطہ فوجداری 1898 ء و جہانی کہول آ زالبول بندی تا بابت رائج کانود، قاعدہ وضابطہ و وڑوڈول نا رداٹ سلوک ءِ ہراحداسکان پک کننگ انگ ءِ۔ کمیٹی دا ہیت ءِ پک کیک کہ زالبول آتے اوفتا جسمانی، نفسیاتی، جذباتی و راجی گرج آتا رداٹ مخصوص آسراتی دوبرے۔ کمیٹی جیل و ایلو تعلقدار قاعدہ غاتا ہم جاچ ءِ ہلیک و زالبول آتا حالیت ءِ گچین کننگ کن المی سلاہ و سوج پیش کیک۔ کمیٹی زالبول بندی تا بابت خاص کر گورننس، کانودی کمکاری، جیل آتا انتظامی پنجر و وڑوڈول نا جاچ ءِ ہلیک و گچینی کن سلاہ ایتک۔ کمیٹی زالبول تیا تشدد و انسانی حق انا خلاف ورزی تا انفرادی واقعہ غاتا ہم جاچ ءِ ہلیک و ادارہ جاتی کہول آ احتساب کن گام گیج سلاہ کیک۔ کمیٹی جیل تیٹی زالبول آتون چناتا حالیت آتا ہم جاچ ءِ ہلیک و دا چناتے تعلیم نا فراوانی و اوفتا راجی آسراتی کن ہم سلاہ ایتک۔ کمیٹی جیل آتا گورننس نظام نا گچینی کن ہم قابل عمل و جامع تجاویز ایتک۔ کمیٹی زالبول بندی تے رہائی آن پد راج اٹی تینا کڑد ءِ ادا کننگ نا قابل کننگ و اوفتا راجی آسراتی تون تعلقدار ایلو باندات آتیا ہم کاریم کیک۔ کمیٹی 4 تُو انا تہہ ٹی تینا رپورٹ ءِ وزیراعظم ءِ پیش کیک۔
