اسلام آباد۔ 24 فروری (اے پی پی) پاکستان بھلو کچ اسے ٹی مہاجر آتا میزبانی ئِ کروک آ غٹ آن بھلا ملک ئِ ، ملک اٹی کم و ود غٹ مہاجر آتا تعلق اوغانستان آن ئِ۔ داہیت ئِ پناہ گزین آتے کن اقوام متحدہ نا ادارہ یو این ایچ سی آر نا کنڈآن جمعہ نا دے جاری اسہ رپورٹ اسے ٹی پاننگانے۔ رپورٹ نا رداٹ پاکستان دنیا نا غٹ آن بھلا مہاجر آبادی نا گدرینگوک آ مسہ دہائی آن ملوک آ است اتون میزبانی ئِ کننگ ئِ و داسہ جہانی برادری نا کنڈآن کمکاری مستی المی مسنے۔ داوخت پاکستان 1.45 ملین اوغان مہاجر آتا میزبانی ئِ کننگ ئِ۔ رپورٹ اٹی پاننگانے کہ پاکستان آن اوغان مہاجر آتا رضاکارانہ پدی ہِننگ نا کچ ہم مچ آ دنیا ٹی غٹ آن بھلن ئِ۔ مارچ 2002 آن ہلیس داوخت اسکان یو این ایچ سی آر پاکستان آن 4.1 ملین اوغان مہاجر آتا وطن آ پدی ہِننگ اٹی کمک کرینے۔
