اسلام آباد ۔ 28 مئی (اے پی پی) بنجاھی وزیر ہوا بازی غلام سرور خان ءَ گوشت کہ 22 مئی 2020 ءَ لاہور ءَ چہ کراچی ءَ روکیں بالیگ لینڈنگ ءِ ساھت ءَ اپسوزی رن ءَ کپگ ءِ پٹ ءُ پول پاک فضائیہ ءِ کلانہ ایں اپسرگ آنی سروکی ءَ بورڈ کنگ ءَ انت، واکیہ ءِ بنداتی رپوٹ 22 جون ءَ پارلیمنٹ ءُ راج ءِ دیم ءَ پیش کنگ بیت، بالیگ ءِ واکیہ ءَ 99 مسافر ءُ کاک پٹ کارندہ سوار اتنت ایشانی تہ ءَ 97 شہید بوتگ ءُ 2 میریکل ءِ رنگ ءَ رکھ اتنت ایش شر ءُ بروبر انت، 51 میت آنی ڈی این اے پجار ءَ چہ پد آوانی سیاد ءُ وارس آنی ھوالگ ءَ کنگ بوتگ انت، ایندگر میت پجار ءِ پروسس ءِ تہ ءَ انت ایشاناں زوت آوانی سیاد ءُ وارس آنی ھوالگ ءَ کنگ بیت، پٹ ءُ پولہ رپوٹ ءِ دیم ءَ آیگ ءَ چہ زمہ وار آنی ھلاپ ءَ کاروائی کنگ بیت اچ کس ءَ گوں اچ رنگیں ریایت کنگ نہ بیت۔ بنداتی رپورٹ ءِ دیم ءَ آیگ ءَ چہ پیسر میڈیا ٹیکنیکی بھر آنی سر ءَ بے سر ءُ پادیں باست ءُ واست ءَ چہ وت ءَ بہ رکھین انت۔ اے ھیالانی درشانی آئی ءَ پنچ شمبے ءِ روچ ءَ پریس انفارمیشن ڈیپارٹمنٹ ءَ پریس کانفرنس ءِ ساھت ءَ کت۔ آئی ءَ گوشت کہ اے سک باز اپسوزی واکیہ ءِ بوتگ ایشی ءَ چہ سرجمیں راج گمیگ بوتگ۔ آئی ءَ گوشت کہ واکیہ ءِ انچو ھال منا سر بوتگ من وتی کوچگ ءَ چہ اسلام آباد ءَ پج اتگ آں ءُ توامیں سیادی داروکیں اپسرگ آنی گوما ویڈیو لنک دیوان گوانک جتگ ءُ زوتاں زوت مزن وزیر ءِ منظوری ءَ گوں مزن تکی پٹ ءُ پولہ بورڈ ءِ جوڑ کنگ بوتگ ایشی ءِ سروکی ءَ ائیر فورس ءِ اپسرگ کنگ ءَ انت، وھدیکہ پی آئی اے، سول ایوی ایشن اتھارٹی ءُ سیادی داروکیں شوبگ آنی نماھندگ آں ھوار ائیر بس ءِ یکجائی ءَ تیار کنوک فرانس ءُ جرمنی ءِ 11 باسکی ٹیمب ھم ایشی یے بھر انت۔ آئی ءَ گوشت کہ واکیہ ءِ جاھ ءَ چہ پرشتگیں چیز آنی آ جاھ ءَ چہ دور کنائینگ ءِ اھوال ءِ تہ ءَ اچ راستی نیست، دومی روچ ءَ من وھد ءِ آ جاھ ءِ سر ءَ پج اتاں اے وھد ءَ ھم پرشتگیں سامان ھما جاھ ءَ اتنت ءُ جرمنی ءُ فرانس ءِ 11 باسکی ٹیمب وھد ءِ پاکستان ءَ سر بوت آواں ھم ھما جاھے چار ءُ تپاس کنائینگ بوت۔ بنجاھی وزیر ءَ گوشت کہ واکیہ ءِ جاھ ءِ تر ءُ تاب ءَ ابید شہید آنی گس ءُ بچتگیں مردم آنی گوما ھال پرسی ھم کت ءُ ھما ماڑی آناں کہ تاوان رستگ ھما گس ءُ ماڑی آنی آماچیں مردم آں گوں ھم گند ءُ نند کت۔ جتا جتائیں ادارگ آں ابیدد والنٹری مردم آں ھم موہ ءِ سر ءَ مردم آنی کمکی کاروائی ءَ بے ترس ءُ بیم ءَ بھر ءُ زوری کتگ۔ آئی ءَ گوشت کہ ڈی این اے ءِ پجار ءَ چہ پد مئے کوشست انت کہ ایندگر بچتگیں میت آناں آوانی سیاد ءُ وارس آنی ھوالگ ءَ کنگ بیت۔ آئی ءَ گوشت کہ بنی آدم آنی نپس ءِ اچ مٹ ءُ بدلی بوت نہ کنت۔ آئی ءَ گوشت کہ پاکستان ءِ جوڑ بوھگ ءَ چہ پد 12 بالی وئیل بوتگ، 10 واکیہ پی آئی اے ءِ بالیگ آنی ءُ دو ایندگر بالیگ کمپنی آنی جہاز آنی بوتگ۔ بلے مرچی ءَ تاں اچ واکیہ ءِ وھد ءُ موہ ءِ سر ءَ رپوٹ دیم ءَ نہ اتکگ۔ آئی ءَ گوشت کہ وزیر ءِ ہوا بازی ءِ بستار ءَ منی کوشست بیت کہ اے واکیہ آنی ھم رپوٹ راج ءِ دیم ءَ پیش بہ بنت۔ آئی ءَ گوشت کہ ائیر کراففٹ انویسٹی گیشن بورڈ 2019 ءِ ایوی ایشن پالیشی ءِ چیر دستی ءَ جوڑ کنگ بوتگ ایش میاں اوستمانی کانود آںی رد ءَ انت ءُ اے بورڈ اچ کس ءِ گوشگ ءِ پد ءَ جوڑ کنگ نہ بوتگ۔
