اسلام آباد ۔ 28 مئی (اے پی پی) مزن وزیر عمران خان ءَ وام آنی تہ ءَ ریلیف ءِ واستہ جی 20 ملک آنی گامگیج آناں وش اتک کنان ءَ گوشت کہ دیمروئی کنوکیں ملک آنی کرا اینکیاس مالی آسراتی نیست کہ آ وتی معیشت ءَ را برجا ءُ ھمزوریں تبک ءِ مردم آنی کمک ءَ کت بکن انت۔ کورونا یک میاں اوستمانی جیڈھ ات ءُ ایشی ءَ گوں میاں اوستمانی وڑ ءُ پیم ءَ گر ءُ چیل بوتگ آں۔ کورونا وائرس ءِ شنگ ءُ تالانی ءَ دگنیا ءِ معیشت آماچ بوتگ انت، مئے برآمدی چیز ھم آماچ بوتگ انت، دیمروئی کنوکیں ملک اگاں یک جیڈھ ئے ءَ چہ در کپگ ءِ ھاترا گامگیج چست بکن انت گڈا سرجمیں دگنیا اے جیڈھ ءَ چہ در کپ ایت۔ آئی ءَ اے ھیالانی درشانی کورونا ءُ ایشی ءَ چہ پد دیمروئی ءِ واستہ سرمایہ کاری ءِ ھوالگ ءَ میاں اوستمانی ورچوئل دیون ءَ گوں گشتانک کنان ءَ کت، کینیڈاءُ جمیکا ءِ مزن وزیر ، یونائیٹڈ نیشن ءِ سیکرٹری جنرل ءِ یکجائی ءَ گوں دیوان ءِ سروکی کت۔ ایشی ءِ تہ ءَ فرانس ، زرّباری افریقہ، کزاکستان ءِ صدر ھم شریک ات۔ مزن وزیر عمران خان ءَ گوشت کہ ما وتی معیشت ءِ گہتری ءِ واستہ ھرچ پیکیج ءِ دیگ ءِ بستار ءَ دار آں ءُ اے مئے ملکی راجدپتر ءِ درستاں چہ مستریں پیکج ھم بوتگ ایش کساس 8 ارب ڈالر ءِ کلی بوتگ۔ امریکہ ءِ بابت ءَ مالوم داری است کہ آ 3 ٹریلین ڈالر، جرمنی یک ٹریلین یورو ءُ جاپان یک ٹریلین ڈالر ءِ پیکج دیگ ءَ انت ءُ اگاں ایشاناں دیمروئی ءِ کشک ءَ نوک رھادگ بوتگیں ملک آں گوں دیم پہ دیمی بکن ات گڈا نوک دیمروئی کنوکیں ملک وتی معیشت ءَ را گہتر کنگ ءِ واستہ 7 ٹریلین ڈالر ءِ پیکج ءَ دیگ ءَ انت۔ مزن وزیر ءَ گوشت کہ بد بھتی ءَ چہ نوک دیمروئی کنوکیں ملک آنی کراّ مالی آسراتی نیست انت کہ آ وتی معیشت ءَ را برجا بکن انت، وتی چاگرد ءِ ھمزوریں تبک ءِ مردم آنی کمک ءَ کت بکن انت۔ مزن وزیر ءَ گوشت کہ ما موسمی مٹ ءُ بددلی ءِ جیڈھ آں گوں گر ءُ چیل بوھگ ءِ واستہ 10 بلین ٹرری منصوبگ ءِ سر ءَ کار کنگ ءَ آں بلے ایشی ءِ واستہ مارا وتی آسراتی آناں کورونا وائرس ءِ سبب ءَ بوھوکیں لاک ڈائون ءَ چہ مھتل کنگ ءَ آں۔ مزن وزیر ءَ گوشت کہ ما وتی سیل ءُ سواد ءِ شوبگ ءِ برجائی ءِ کوشست ءَ کنگ ءَ آں بلے استیں جاور ھال آنی گوما ھم دیم پہ دیمی انت۔ آئی ءَ گوشت کہ اے نازرکیں ساھت ءَ نوک دیمروئی کنوکیں ملک آنی واستہہ الس ءِ جاور گہتر جوڑ کنگ ءِ جہد ءُ کوشست ءَ کنگ ءَ آں، وھد ءِ ما ایتھوپیا ءِ مزن وزیر ءُ مصر ءِ صدر ءُ نائیجیریا ءِ مزن ویزر ءَ گوں گوں تران کت گڈا آواں گوشت کہ آ ھم ھمے رنگ ءَ جیڈھ آنی گوما دیم پہ دیم انت۔ مزن ویزر ءَ گوشت کہ آ اے موہ ءِ سر ءَ جی 20 ملک آنی نیمگ ءَ وام آنی تہ ءَ ریلیف ءِ ٹوھیں گامگیج آناں وش اتک کنت۔ آئی ءَ گوشت کہ اے جیڈھ ءِ سر ءَ سک باز چار ءُ بچار ءِ ضلورت انت۔ نوک دیمروئی کنوکیں ملک آنی کمک کنگ بہ بیت چیا کہ منا ترس انت کہ بیم مئے سسا ساچ ءَ چہ گیش بوت کن انت چیا کہ دیمروئی کنوکیں ملک آنی آباتی یک ارب 50 کروڑ ءُ دیمروئی کنوکیں ملک آنی آباتی 6 ارب ءِ کساس انت۔ تاں وھد ءِ اے جیڈھ ءِ سر ءَ ٹوھیں رنگ ءُ میاں اوستمانی تک ءَ گیواری کنگ مہ بیت گڈا دگنیا ءِ آباتی یے مزنیں بھرے گریبی ءِ آماچ بیت ایشی ءِ سبب ءَ دزئی ڈنگی ءُ بیم تالان بیت۔ مزن وزیر ءَ گوشت کہ آ دیوان ءِ گوانک جنگ ءِ پد ءَ یونائیٹڈ نیشن ءِ سیکرٹری جنررل ءَ را مبارک بات پیش کنت، کینیڈا ءِ مزن وزیر ٹروڈو ءُ جمیکا ءَ مزن وزیر ءَ را گوشت کہ آ اے گامگیج ءِ سر ءَ کار کنگ ءِ کوشست بکنت چیا کہ ایش المی انت کہ دگنیا کوویڈ-19 ءِ سبب ءَ سک باز آماچ بوتگ ءُ دنیا ءَ را اے سرجمیں جیڈھ ءَ را میاں اوستمانی رد ءَ چارگ لوٹ ایت۔ آواں گوشت کہ نوک دیمروئی کنوکیں ملک اے جیڈھ ءَ را میاں اوستمانی رد ءَ بچار انت گڈا منا دل یکیمی بیت کہ ما درست اے مشکلیں جاور ھال آں چہ در کپ آں۔
