ننا ایٹمی قوت پاکستان و اونا الس نا رکھ انا ضامن ءِ، قوم ملک انا دفاع و شونداری کن اسٹ ءُ
اسلام آباد۔ 28 مئی (اے پی پی) بنجائی وزیر حوالکاری وشینکاری سینیٹر شبلی فراز پارینے کہ اینو نا دے پاکستان ءِ اسلامی دنیا نا اسٹ انگا ایٹمی طاقت مننگ نا شرف دوئی مس، ننا ایٹمی قوت پاکستان و اونا الس نا رکھ و سلامتی نا ضامن ءِ، قومی شرف و سالمیت ننکن غٹ آن اہم ءِ، تینا بیانیہ تون وفاکپروک آک قوم اتون انت وفاکرور۔ پنچ شنبے نادے آ تینا ٹویٹ اٹی اوپارے کہ قوم ملک انا دفاع و شونداری کن اسٹ ءُ۔ اومریم نواز ءِ مخاطب کرسا پارے کہ مریم نواز صاحبہ پاکستان ءِ ایٹمی قوت جوڑ کروک آ اسہ چین اسے نا خواری و کوشست آتے ہرگڑاغانبار تینا خاہوت تون گنڈپ، تینا کارندہ غاتے تنیا ہلسا ہر وار میدان آن نروک آتیان قوم معلومدار ءِ۔ اوپارے کہ ہرابیانیہ تون وفا کننگ کتو او الس تون انت وفا کروئے، نما سرکڑدہ نا وفا مش اتون آخا پیسہ تون ئس، دا وفاتا عکس آک ایون فیلڈ و ایلو میرات آتا دروشم اٹ مچ آ دنیا ٹی نظر بریرہ۔ اوپارے کہ قوم انا چناتا آخبت ءِ پلسا تینا اولاد آتا زند ءِ جوڑ کروک آتے قوم اسُل بشخپک۔
