دود انا میزبانی ءِ کینیڈا، جمیکا و اقوام متحدہ نا سیکرٹری جنرل ئسک کیرہ، مچ آ دنیا غان چنیدہ سروک مملکت و حکومت ءِ دود اٹ بٹنگ انگانے
اسلام آباد۔ 28 مئی (اے پی پی) وزیراعظم عمران خان کورونانا دین و اونا پد انا دور اٹی شونداری کن زرکاری نا بابت بڑزکو کہولی ورچوئل دود اٹ اینو بشخ ہلیک۔ پنچ شنبے نادے آ وزارت خارجہ نا کنڈآن جاری بیان نا رداٹ دا دود انا میزبانی ءِ کینیڈا، جمیکا و اقوام متحدہ نا سیکرٹری جنرل ئسک کننگ ءُ۔ مچ آ دنیا غان چنیدہ سروک مملکت و حکومت آتے دا بڑزکو کہولی دود اٹی بٹنگ انگانے۔ وزیراعظم عمران خان آن بیدس، فرانس ، سویلی افریقہ، قزاخستان نا صدر، برطانیہ، جاپان، ناروے، اٹلی، آئرلینڈ نا وزیر اعظم آک، جرمن چانسلر و سعودی عرب نا ولی عہد دا بڑزکو کہول انا دود آن تران کیرہ۔ پدتموک ملک آتا وام تا بابت ویل، مالی باندات آتا بابت دا شش سرحال آتے ٹی اوار ءُ ہرافتیا بڑزکو کہولی دود اٹ ہیت مریک۔ وزیراعظم عمران خان اپریل اٹی’’ وام اٹ ریلیف تننگ نا جہانی گام‘‘ نا بناءِ کریسس تانکہ پدتموک ملک آتے کن وسیلہ غاتا فراوانی نا گنجائشت ودی کننگے تانکہ او کورونانا دین اٹی مون تروک ساڑی آ تنکی تون جوان وڑاٹ مون تننگ کیر و پائیدار زرگزرانی شونداری نا بحالی ممکن مننگ کے۔ اونا دا گام و پاکستان نا کماشی ٹی پدتموک و شون ہلوک ملک آتا نمائندہ پڑک و بھلا مالیاتی ادارہ غاک اقوام متحدہ نا سائیڈلائنز آ دا سرحال آ غیر رسمی سلاہ و مشورہ نا بناءِ کریر تانکہ گڑاس باندات و دا عملی گام گیج آتیا امنائی سلاہ ودی مرے ہرافتا کمک اٹ پدتموک ملک آتے مون تروک وام تا ویل اتون مون تننگ مرے۔ دا بڑزکو کہولی دود اٹ وزیراعظم عمران خان تینا وژن آن معلومدار کیک کہ ہراوڑوام تا ویل و پدتموک ملک آتے مون تروک مالی مشکل آتون مون تننگ مریک۔ وزیراعظم عمران خان ءِ دا دود اٹی بشخ ہلنگ نا سلہ پدتموک ملک آتا مخلص ترجمان نا وڑاٹ اونا کڑد و نیزگار ملک آتے وام تا زور آن نجات نا اجتماعی ایسری نا اونا وخت آ خواست انا اعتراف نا درشانی ءِ۔ دا اعتراف پاکستان ءِ دا موقع ءِ تسنے کہ او بھلا زرگزرانی و اقتصادی طاقت آتون اوار متبر ملک آتا پڑک آتون اواری اٹ وام تا ویل ءِ ایسر کے۔ وام، لیکویڈیٹی، زرکاری و پائیدار شونداری کون آ کلیدی ویل آتا ایسری کن وزیراعظم عمران خان نا قائدانہ کڑد آن پاکستان و ایلو پدتموک ملک آتے کن گمان آتے ٹی بے کچ ودکی مسنے کہ او جہانی مخ تفی، یکجہتی و کمک دوئی کیر ہرانا اوفتے دا وخت آ سخت گرج ءِ تانکہ اسہ صدی اس مست بروک آ بدترین جہانی کساد بازاری آن پد آن مون تروک ساڑی زرگزرانی تنکی آن دنیا نا ترندی اتون بحالی نا کنڈآ پدی بننگ پک مننگ کے۔
