چین اٹی پاکستان نا سفیر نا پی ٹی وی نیوز چینل ءِ خصوصی انٹرویو

پاکستان و چین نا نیام اٹ زرگزرانی کمکاری ٹی پین ودکی مریک، نغمانہ ہاشمی
اسلام آباد۔ 21 مئی (اے پی پی) چین اٹی پاکستان نا سفیر، نغمانہ ہاشمی پارینے کہ پاکستان و چین نا نیام اٹ زرگزرانی کمکاری ٹی پین ودکی مریک و ساڑی آ ناول کوروناوائرس آن ہڑتوم آ ملک آتا ایلمی آ مبنی تعلقداریک زہمی مفسہ انتئے کہ ہڑتوم آ ملک آتا سنگتی این آنبار سوگو ءِ ہرا ضرورت نا ساہت اٹی مدام اسہ ایلو تون سلرہ۔ او پی ٹی وی نیوز چینل ءِ اسہ خصوصی انٹرویو اسے ٹی پارے کہ حالیت آتے ٹی بدلی آن قطع نظر، چین وپاکستان نا تعلقداری تیٹی ہچ ءُ بدلی اس بفک۔ اوپارے کہ ہڑتوم آ کنڈآتا تعلقداریک پوسکن آ بڑزی تسکان سرمسنو ہرابروک آ دے تیٹی پین سوگو مریرہ۔ اومستی پرے کہ تدوک آ 70 سال اٹی ہڑتوم آ ملک آک اسہ ایلو نا بنداوی فائدہ غاتا شرف و اوفتا مخ تفی ءِ کرینو، ہراڑآن پرخلوصی سنگتی ءِ مون آ دننگا۔ اوپارے کہ کوویڈ۔ 19 نا تالان مننگ نا پد آن، نن چینی حکومت تون خڑکی رابطہ کاری ٹی اُن۔ نغمانہ ہاشمی مستی پارے کہ چین اٹی دینی مرض انا تالان مننگ آن پد، پاکستان نا حکومت و خلقت چین ءِ پبی کمک و مدد نا سلہ خلکوسر و پاکستان اولیکو ملک ئس ہراچین ءِ تینا پورو مخ تفی نا سلہ ءِ خلکوسس۔ اوپارے کہ ایلو ملک آتیانبار پاکستان و چین ہم جہانی دینی مرض کوویڈ۔ 19 نا مون ءِ توننگ نا کوشست کننگ ءُ۔ اومستی پارے کہ چین و پاکستان نا نیام اٹ تین پہ تینی تعلقداری یکتا و کثیر جہتی ءِ۔ اوپارے کہ وزیراعظم عمران خان نا کماشی ٹی پاکستان نا حکومت دودوربیدہ ئی و الس تون الس نا رابطہ غاتا بشخ اتون اوار برادرانہ تعلقداری تے مون آ دننگ و اوفتا سوگوی کن سنبرینگوک ءِ۔