وزیر خارجہ مخدوم شاہ محمود قریشی نا سلابتی دیوان آن تران

اسلام آباد۔ 21 مئی (اے پی پی) وزیر خارجہ مخدوم شاہ محمود قریشی پارینے کہ دنیا ترندی اٹ جہانی زرگزرانی تنکی نا کنڈآ ہِننگ ءِ، پدتموک ملک آتے کن زہم آک غٹ آن زیات مریرہ، ننے اقتصادی سفارت کاری ءِ مون آ درسا زرگزرانی ہدف آتا دوئی کننگ کن تینا کوشست آتے کاریم اٹ اتوئی مریک۔ او پنچ شنبے نادے آ وزارت خارجہ ٹی علاقائی سلامتی و پاکستان نا اولیت آتا بابت سلابتی دیوان نا کماشی ءِ کریکہ۔ دیوان اٹی وزیراعظم نا خصوصی کمکار قومی سلامتی معید یوسف، سیکرٹری خارجہ سہیل محمود، چاہندار امور خارجہ و وزارت خارجہ نا بڑزکو کمامدارآک بشخ ہلکر۔ دیوان اٹ کورونا وائرس نا چیلنج، ڈیہہ نا بدلینگوک آ حالیت و دادینی جلہو اٹی ڈیہہ ءِ مون تروک چیلنج آتیا سرجم گپ وتران کننگا۔ وزیر خارجہ پارے کہ ننے کوویڈ۔ 19 آن پد انا علاقائی و جہانی حالیت آتا رداٹ پوسکن آ گمانی چیلنج آتون مون تننگ کن تینا تیاری ءِ پوروکروئی مریک۔ کورونا دین انا سوب دنیا ترندی اٹ جہانی زرگزرانی تنکی نا کنڈآ ہِننگ ءِ و پدتموک ملک آتے کن دا دین انا مضمر آک غٹ آن زیات مریرہ۔ داحالیت آتے ٹی ہراتم کورونا نا سوب ننا زرمبادلہ ترندی اٹ کم مننگ ءِ و برآمد آتا کچ بھاز کم مسنے ننے تینا زرگزرانی بحالی کن پوسکن ءُ وارخواہی آ چکار کروئی مریک۔ شاہ محمود قریشی پارے کہ پاک۔ چین اقتصادی راہداری ڈٹ آتا وخت آ پوروی ننا اولیت آتے ٹی اوار ءِ۔ اوپارے کہ اوغانستان اٹی امن و سوگوی مچ آ ڈیہہ کن بے کچ اہمیت تخک۔ پاکستان اسیجا زمواری نا رداٹ اوغان عمل اٹ تینا خیرخواہی نا کڑد ءِ جوانی انگا نیت اتون ادا کرسا بننگ ءِ و پین وخت اس ہم کرسا کیک۔