جمعتہ الوداع، شب قدر، چنکا عئید انا نماز کن ایس اوپیز، درملکی جہاز آتا ملنگ، پی پی ایز و طبی ازباب آتا ساڑی آ کچ و ترسیل نا باندات آتیا سجفنگا
اسلام آباد۔ 20 مئی (اے پی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر نا کماشی ٹی نیشنل کمانڈ اینڈ آپریشن سینٹر (این سی او سی) ٹی چارشنبے نادے آ بڑزکو کہول انا دیوان اس اڈ ہلک۔ دیوان اٹی جمعتہ الوداع، شب قدر، طاق نن، یوم القدس، چنکا عئید انا نماز کن ایس اوپیز، درملکی جہاز آتا ملنگ، پی پی ایز و طبی ازباب آتا ساڑی آ کچ و ترسیل نا باندات آتیا سجفنگا۔ بنجائی وزیر داخلہ بریگیڈیئر (ر) اعجاز احمد شاہ فورم ءِمعلومدار کرے کہ یوم علی آ چندی ضلع غاتے ٹی کروک آ گڑاس خلاف ورزی تیان پد چندی مکتبہ فکر انا عالم دینک حکومت نا کنڈآن پابندی و ایس پی پیز آ عمل کپننگ نا عندیہ تسنو ایہن تو یوم علی آن مست غٹ صوبہ غاک این سی او سی نا فورم آ امنا کریسر کہ مچ آ ملک اٹی اسہ جاگہ اس ہم یوم علی نا وخت آ جلوس و مجالس مفک ولے داکان پد ہم داوڑ مس و وی آئی پی شخصیت آک جلوس آتے ٹی بشخ ہلکر ہالانکہ جلوس و مچی آن کوروناوائرس بھلو کچ اسے آ تالان مننگ نا گڑتی ءِ۔ وزیر داخلہ پارے کہ ایس او پیز و گائیڈ لائنز تیا عملدرآمد کن طاقت ءِ اسُل کاریم اٹ اتنگپ انتئے کہ گڑاس زموار امن و سوگوی ءِ خراب کننگ کن دا حالیت آتیان فیصلہ غاتے ہرفنگ کیرہ ۔ اوقوم آن خواست کرے کہ کوروناوائرس نا تالانی ءِ توننگ کن مذہبی ایس اوپیز آ عمل کیر ہنداڑآن کوروناوائرس ءِ توننگ مریک۔ گلگت بلتستان و آزاد جموں و کشمیر تون اوار صوبہ غاتا چیف سیکرٹریک عئید انا نماز نا وخت آ اجتماعی مچی تا اڈتننگ و یوم القدس نا بابت گام گیج آتیان معلومدار کریر۔ سیکرٹری ایوی ایشن حسن ناصر جامی پارے کہ 21 مارچ آن فضائی دنگ بند مننگ نا سوب آن سول ایوی ایشن ہر ہفتہ 2 ارب روپئی آن زیات نا نسخان ہرفنگ ءِ۔ اوپارے کہ پاکستان انٹرنیشنل ایئرلائنز (پی آئی اے) نا کنڈآن خصوصی جہاز آک اینو ملک آ رسینگرہ وخت اس کہ ملک انا تہہ ٹی جہاز و بالی پٹ آک ایس او پی آ عمل کننگ ءُ۔ اوپارے کہ پیشن نا ملک آپریشن ءِ بناکننگ آن ہچ ءُ ویل اس ودی مفک۔ دانا کمک اٹ زرگزرانی چیلنج آتون مون تننگ اٹ کمک رسینگک انتئے کہ فلائنگ کلب نا ہم نسخان مننگ ءِ۔
