پاکستان اوغانستان اٹی امن نا خواہندار ءِ
اسلام آباد۔ 20 مئی (اے پی پی) صدر مملکت ڈاکٹر عارف علوی پارینے کہ پاکستان اوغانستان اٹی امن نا خواہندار ءِ، نن اوغانستان تون گچین تعلقداری خوانہ، غیر وابستہ تحریک نا دیوان اٹی ہم باور کرفین کہ پاکستان کورونادین انا رداٹ تینا اوغان ایلم تتون ہمو سلوک ءِ کیک ہراوڑ او تینا شاری تتون کیک، اوغانستان اٹی امن آن اوغان باہوٹ آک تینا اُراتیا پدی کارہ، ترکی و پاکستان ملوکک آ است اٹ تینا باہوٹ ایلم تا کمک ءِ کرینو، عئید انا مچی تیٹی ہم ننے زموار قوم اس مننگ نا شاہدی ءِ تروئی ءِ و کورونا غان بچنگ کن رکھی گام گیج آتیا عمل کروئی ءِ۔ داخیال آتا درشانی ءِ او چارشنبے نادے آ داڑے اوغان باہوٹ آتے ٹی راشن بیگ بشخنگ نا دود آن تران کرسا کرے۔ اوپارے کہ خواجہ محمد صلی اللہ علیہ وآلہ وسلم نا اسوہ حسنہ و اسلامی تعلیمات آتیان ننے ایلوفتا کمک ءِ کننگ نا درس ملک، خیرات و زکواۃ آ وار وار آ زور شاغنگا، حقوق اللہ تون اوار اوار حقوق العباد نا ادائیگی ہم اہم ءِ۔ اوپارے کہ سد سال آن ہراقومک ننے انسانیت و حقوق العباد نا پنت و شون کریرہ ہموقومک باہوٹ آتے قبول کننگ کن تیار افس۔ صدر مملکت پارے کہ ترکی و پاکستان ملوک آ است اٹ تینا باہوٹ ایلم تا کمک ءِ کرینو، ترکی ٹی شام آن لکھ آ باہوٹ آ بسنو وخت اس کہ پاکستان اٹی اوغانستان آن بروک آ لکھ آ باہوٹ آک 35 سال آن رہینگ انگ ءُ۔ اوپارے کہ اوغانستان تون آخبت اٹ گچین تعلقداری نا خواہندار اُن۔ صدر مملکت پارے کہ غیر وابستہ تحریک نا ورچوئل دیوان اس مسوسس ہراٹی او پاریسس کہ پاکستان کورونا دین انا رداٹ تینا اوغان ایلم تتون ہمو سلوک ءِ کیک ہراوڑ تینا شاری تتون کیک، اوغانستان اٹی امن نا کوشست آتا ستاءِ کینہ و اوفتا مخ تفی ءِ کینہ۔ اوپارے کہ نن دہشت گردی نا مقابلہ ءِ کرین تو ننے امن نا اہمیت نا احساس مس، اوغانستان نا ورنا چین تے امن نا بھرم تا داسکان اندازہ اف، زوت اوغانستان اٹی امن بریک، اوغان ایلمک تینا اُراتیا پدی کارہ و خوشی کیرہ۔ اوپارے کہ کورونا نا دین آن غٹ تپہ غاک زہمی مسنوو ہچ کس تپک کہ دا دین ہراتم چٹک، بیرہ رکھی گام گیج تا کمک اٹ داڑآن بچنگ مریک، نن بازار، مسیت و نماز نا وخت آ ماسک خلین و راجی فاصلہ ءِ برقرار تخن، دوتے مون آ خلپن، داڑآن نئے بیرہ نم تینٹ بلکن نما قریب و سیال آک ہم رکھ مریرہ۔ داوخت آ خاتون اول بیگم ثمینہ علوی، بنجائی وزیر سیفران صاحبزادہ محبوب سلطان، منیجنگ ڈائریکٹر بیت المال عون عباس بپی ، ترکی نا سفیر مصطفیٰ یرداکل و اوغانستان نا سفیر ئسک ہم ساڑی ئسر۔
