کورونا نا دین انا رداٹ عالم دین تا کڑد آ گپ وتران
اسلام آباد۔ 20 مئی (اے پی پی) وزیراعظم عمران خان تون پاکستان تحریک انصاف نا مرکزی سیکرٹری مذہبی امور پیر سید حبیب عرفانی و عالم دینک اوڑدہی کریر۔ چارشنبے نادے آ وزیراعظم آفس نا میڈیا ونگ انا کنڈآن جاری بیان نارداٹ وزیراعظم تون اوڑدہی کروک آ عالم دین تیٹی پیر سید اسرار الحق نظامی، پیر توصیف النبی مجددی، علامہ عظمت حسین شاہ و علامہ محمد اصغر اوار ئسر۔ اوڑدہی ٹی کوروناوائرس نا رداٹ ساڑی حالیت آتے ٹی عالم دین تا کڑد خاص کر الس اٹ رکھی گام گیج آتا مون آ دننگ اٹ عالم دین تا کڑد انا بابت گپ وتران کننگا و مسیت، درگاہ و خانقاہ تا باندات آتا گچین بست وبند نا بابت ہم گپ وتران کننگا۔ اوڑدہی ٹی عالم دین تاکنڈآن چندی سلاہ وزیراعظم ءِ پیش کننگا۔ وزیراعظم عالم دین تتون گپ وتران کرسا پارے کہ کوروناوائرس نا دین انا بابت آگاہی تالان کننگ خاص کر الس ءِ رکھی گام گیج اختیا کرفنگ نا ترغیب تننگ اٹ عالم دین تا کلیدی ءُ کڑد اسے۔ اوپارے کہ حکومت ہر اہم معاملہ ٹی عالم و مشائخ آتیان راہشونی ہلکونے و عالم دین تا سلابت و راہشونی آن باندات آتے ٹی پیش رفت کننگ آ باوری تخک۔
