وزیراعظم ادیب و شاعرآتے کن ودکی مالی آسراتی نا منظوری ئِ تسنے
اسلام آباد۔ 24 فروری (اے پی پی) وزیراعظم نا سلاہکار قومی تاریخ و ادبی میرات عرفان صدیقی پارے کہ وزیراعظم محمد نواز شریف ادیب، شاعر و اہل قلم آتے کن ہمو غٹ ودکی مالی آسراتی تا باضابطہ منظوری ئِ تسنے ہرانا پڑو ئِ او گدرینگوک آ تو اہل قلم نا چارمی جہانی کانفرنس نا بنائی دیوان آن تران اٹی کریسس۔ جمعہ آ داڑے ہیت وگپ کرسا عرفان صدیقی پارے کہ داوخت 354ادیب و شاعر آتے لائف انشورنس نا آسراتی دوئی ئِ۔ وزیراعظم ادیب و شاعر آتا لائف انشورنس کن کچ ئِ 354آن ودفسا 700 کرینے۔ داوخت آ طبی مرک آ اسہ لکھ و حادثاتی مرک انا دروشم اٹی اِرالکھ روپئی خاہوت آتے بطور انشورنس پیسہ تننگک۔ وزیراعظم دا پیسہ غاتے ودفسا بالترتیب اِرالکھ و چارلکھ روپئی کرینے۔ داوخت آ مچ آ ملک اٹی 500 گرج مند ایل قلم ئِ ماہانہ وظیفہ تننگ انگ ئِ۔ وزیراعظم دا وظیفہ غاتا کچ ئِ 500 آن ودفسا اسہ ہزار کرینے۔ داکان بیدس وظیفہ غاتا ساڑی آ پنچ ہزار روپئی ماہانہ نا پیسہ غاتے ودفسا 13 ہزار روپئی ماہانہ کننگانے۔ عرفان صدیقی مستی پارے کہ دا وخت اکادمی ادیب آک پاکستان نا ذریعہ قومی و علاقائی زبان تا کتب آ 11سالانہ ایوارڈ تننگاکہ۔ وزیراعظم داایوارڈآتا کچئِ 20کرینے تانکہ ورناو زالبول قلم کار آتا ہم است بڈی مننگ کے۔
