کوئٹہ۔ 22 فروری (اے پی پی) بلوچستان رورل سپورٹ پروگرام صوبہ نا خلقی علاقہ غاتا الس نا زند انا آب ءِ بڑزکننگ کن چندی پروجیکٹ آتیا کاریم کننگ ءِ تانکہ بلوچستان نا مر مر انگا علاقہ غاتا الس ءِ زند انا بنداوی گرج تعلیم صاف ءُ دیر و جان جوڑی و صفائی کون آ آسودہی دوبننگ کے داکان بیدس بی آر ایس پی معذور بندغ آتا شرحالی و اوفتے تینا نت تیا سلنگ کن اسہ پروجیکٹ اسے آ کاریم نا بناءِ کرینے داوخت صوبہ نا ہرچارضلع ہراٹی خضدار، ژوب ، لورالائی و جھل مگسی اوار ءُ پروجیکٹ آ کاریم نا بناء کننگانے ولے گڈسراٹی دا پروجیکٹ ءِ ایلو ضلع غاتسکان ودفنگک ۔ داہیت ءِ بی آر ایس پی نا ترجمان تینا جاری کروک پریس ریلیز اٹی کرینے انسانیت نا جوزہ نا رداٹ معذور بندغ آتا کمک کننگ نئے بیرہ عظیم ءُ کاریم اسے بلکن اوفتا کمک ننا مذہبی و قومی فرض ءِ ، داچرجوئی ٹی بی آر ایس پی نا کنڈآن معذور بندغ آتا فنڈ یکجا کننگ کن پانزدہ اپریل 2017ء آ نوری نصیر خان کلچرل آڈیٹوریم کوئٹہ ٹی میوزیکل شواس اڈ تننگانے ہراٹی ملک انا پنی آ فنکارک تینا فن ءِ نشان ایترہ دابابت مخیر خواجہ غاتیان عرض کننگ کہ خیر انا کاریم اٹی زیات آن زیات بشخ ہلیر و خواہش مند مخیر خواجہ غاک بی آر ایس پی نا سیکشن معذور آتون رابطہ کننگ کیرہ۔ دا مچ مروک آ فنڈ آن معذور بندغ آتے مصنوعی عزوہ وہیل چیئر ، لٹ و ایلو ازباب آتے تننگک ہراڑآن نئے بیرہ اوفتا مشکل آتیٹی کمتی بریک بلکن دا خلقت تینا نت تیا سلسا راج انا اسہ کاریمی ءُ بندغ اسے نا حیثیت اٹ ملکی شونداری اٹی گچین کڑد ادا کننگ کیرہ۔
