اسلام آباد۔ 22 فروری (اے پی پی) مسلم لیگ (ن) نا راہشون و زیر ریلوے خواجہ سعد رفیق پارینے کہ وزیر اعظم نواز شریف پوسکن آ پاکستانی نا بانی ءِ و ملک ءِ شونداری ہلوک جوڑ کننگ خوائک، اودے اولیکو جنرل (ر) پرویز مشرف و جسٹس سجاد علی شاہ و داسہ عمران خان نا دروشم اٹی سازش نا نشانہ جوڑ کننگ انگ ءِ، وزیراعظم ، اونا خاہوت و مسلم لیگ (ن) ءِ بدنام کننگ نا کوشست کننگ انگ ءِ ، نن پاناما نا مقدمہ ءِ الس نا عدالت اٹی کینہ۔ سپریم کورٹ نا پیشن ہیت وگپ کرسا اوپارے کہ وزیراعظم محمد نواز شریف ہراتم کہ اقتدار اٹی بس او پاکستان ءِ سوگو جوڑ کننگ کن گام گیج کرے ولے ہر وار اونا برخلاف سازش کننگ و شونداری نا کسرءِ توننگا۔ بنجائی وزیر ریلوے پارے کہ نن آجوئی صحافت و صحافی تتون تفوک اُن ولے برانز و ہنگامہ آرائی ہچ ءُ ویل اسے نا ایسری اف۔ اوپارے کہ وزیرمملکت اطلاعات و نشریات مریم اورنگزیب انوشہ رحمان و صحافی تا نیام اٹ ویل ءِ تینا آفس اٹی ہیت وگپ اٹی ایسر کرفنگ نا سلاہ تسنے۔
