علاقائی و جہانی معاملہ غاتیا ترک سروک آتون وسیع ترصلابت اس کیک
خاتون اول بیگم کلثوم نواز، بنجائی وزیر پٹرولیم و قدرتی وسیلہ شاہد خاقان عباسی ، وزیر واپار انجینئر خرم دستگیر و خصوصی کمکار خارجہ امور طارق فاطمی وزیراعظم تون اوار ئُ
اسلام آباد۔ 22 فروری (اے پی پی) وزیراعظم محمد نواز شریف چارشنبے نا دے ترکی نا 3دے ئی دورہ غا رادہ مس۔ وزیراعظم پاکستان ترکی نا بڑزکو کہول نا سٹریٹجک کمکار کونسل (ایچ ایل ایس سی سی ) نا پنچ می دیوان اٹی بشخ ہلیک۔ خاتون اول بیگم کلثوم نواز، بنجائی وزیر پٹرولیم و قدرتی وسیلہ شاہد خاقان عباسی ، وزیر واپار انجینئر خرم دستگیر و وزیراعظم نا خصوصی کمکار خارجہ امور طارق فاطمی ئسک ہم وزیراعظم تون اوار ئُ ۔ تینا دورہ ٹی وزیراعظم کیہی ہڑتوم آ کنڈآتا علاقائی و جہانی معاملہ غاتیا ترک سروک آتون وسیع تر صلابت و خیال آتا درشانی ئِ کیک۔ وزیراعظم محمد نواز شریف ترک وزیراعظم بن علی یلدرم تون اوار پنچ شنبے نا دے انقرہ ٹی پاک ترک بڑزکو کہول نا سٹریٹجک کمکار کونسل نا پنچ می دیوان نا اسیجائی کماشی ئِ ہم کیک۔ پاک ترک بڑزکو کہول نا کمکار کونسل نا 2009ءٹی ہڑتوم آ ملک آتا نیام اٹ بڑزکو سیاسی کہول آ صلابت کن فریم ورک اسے نا وڑاٹ عمل اٹی اتنگا۔ دا میکنزم ہڑتوم آ سروک آتے سٹریٹجک فوکس و راہشونی فراوان کننگ وآخبت کن اسہ وژن اس ترتیب تننگ اٹی کمکاری کیک۔ کونسل نا رداٹ 6 اسیجائی ورکنگ رڑ کاریم کننگ ئُ ہرافتے ٹی واپار، توانائی، بینکنگ و فنانس، مواصلات ، ریلوے، تعلیم ودودوربیدہ و سیل و سوات نا بشخ آک اوار ئُ۔ کونسل نا دسمبر 2010 ء، مئی 2012ء، ستمبر 2013 ءو فروری 2015ءٹی چاردیوان اڈ ہلکونو۔ آخریکو دیوان 17 فروری 2015ءآاسلام آباد اٹی اڈ ہلکوسس۔ کونسل نا فریم ورک نا رداٹ ہڑتوم آ ملک آتا نیام اٹ 50 آن زیات معاہدہ و مفاہمت آتا یات داشت آتے گڈیکو دروشم تننگانے۔ کونسل نا پنچ می دیوان نا ایسری آ اسہ اسیجائی اعلامیہ اس جاری کننگک وخت اس کہ داوخت آ کیہی معاہدہ و مفاہمتی یات داشت آتیا دستخط نا ہم اومیت ارے۔ دورہ ٹی وزیراعظم محمد نواز شریف ترک صدر رجب طیب اردوان تون ہم اوڑدہی کیک۔ دورہ ٹی وزیراعظم محمد نواز شریف ترک صدر رجب طیب اردوان تون ہم اوڑدہی کیک۔ وزیراعظم محمد نواز شریف 15جولائی 2016ءآ ترکی ٹی بے سہب بغاوت نا برخلاف پاکستان نا حکومت و الس نا کنڈآن یکجہتی و غیر متزلزل مخ تفی نا عزم انا درشانی ئِ کننگ کن ترک پارلیمان نا دورہ ئِ ہم کیک۔ بغاوت نا نن ترک پارلیمان ئِ بمباری نا نشانہ جوڑ کننگاسس۔ وزیراعظم محمدنواز شریف ترکی ٹی جمہوریت نا دفاع کن تینا جان تے ندر کروک آتے خراج عقیدت ہم پیش کیک۔ پاکستان و ترکی نا نیام اٹ تعلقداری ریاست آتا نیام اٹ تعلقداری نا بابت انفرادی حیثیت تخک ہرا غیر معمولی گرم جوشی و تین پہ تینی پت آ استوار ئِ۔ دا برادرانہ تعلقداری نا بنداو اسیجائی عقیدہ ، تاریخ، دودوربیدہ و زبان تیٹی تعلق آ ٹی ئِ۔ ہڑتوم آ قومک کشمیر و قبرص تون اوار تینا قومی مسخت آتے کن اسہ ایلو تون تین پہ تینی کمک کرسا کرینو۔ پاکستان و ترکی نا نیام اٹ ہڑتوم آ کنڈآتا تعلقداری ئِ ساڑی آ سال تیٹی اسہ پوسکن ئُ جہت و فروغ اس ملانے و دا تعلقداری تا دنگ اقتصادی تعلقداری آن ہلیس دفاعی کمکاری و تعلیمی و دودوربیدہ ہی رابطہ غاتا مون آ دننگ اسکان بھلن مسنے۔ ہڑتوم آ کنڈآتا واپار، زرکاری و واپاری کمکاری ئِ مون آ درسا تینا اقتصادی شریداری ئِ پین گچین جوڑ کننگ کن کوشست کننگ ئِ۔ ہڑتوم آ ملک آتا سروک آک 21می صدی نا حق آتے مون آ تخسا تینا تاریخی تعلقداری تے اسہ سوگو ئُ اسٹریٹجک شریداری اسے ٹی بدلیفنگ نا عزم تخک۔ اینخو سال پاکستان و ترکی نا سفارتی تعلقداری نا 70می سال دے ہم اڈتننگ انگ ئِ و داچرجوئی ٹی ہڑتوم آ ملک آک بھاز انگا خصوصی پروگرام و دود اڈتننگ ئُ۔ وزیراعظم محمد نواز شریف نا دورہ ترکی و پاک ترک بڑزکو کہولی سٹریٹجک کمکارکونسل نا پنچ می دیوان اٹی بشخ ہلنگ آن ہڑتوم آ برادر ملک آتا نیام اٹ تاریخی و آزموندہ تعلقداری تے پین مون آ دننگ رسینگک و ہڑتوم آ ملک آتانیام اٹ کیہی بشخ آتیٹی تعلقداریک پین سوگو مریرہ۔
