انتہاءپسند ذہنیت و دہشت گردی انسانیت آ ڈکھ آتا انمٹ نقشہ اس ہلانو
اسلام آباد۔ 21 فروری (اے پی پی) صدر مملکت ممنون حسین پارینے کہ انتہاپسند ذہنیت و دہشت گردی انسانیت آ ڈکھ آتا انمٹ نقشہ ئِ ہلانو، مسلمان اسکالرزآتے بایدے مرے کہ او اسلام ئِ امن نا مذہب نا مثبت وڑاٹ تالان کیر۔ سے شنبے آ داڑے انٹرنیشنل اسلامک یونیورسٹی نا وویمن کیمپس اٹی دود آن تران کرسا صدر مملکت پارے کہ اسلام انسانیت نا شرحالی ئِ المی جوڑ کیک و ہرا عنصر آک اونا شاندار تعلیم تا غلط تشریح ئِ کننگ ئُ و خار تالان کننگ ئُ او انسانیت نا توہین ئِ۔ صدر مملکت ساڑی آ جغرافیائی سیاسی حالیت آتارداٹ امت مسلمہ نا دانشورانہ بنداو تے تالان کننگ نا گرج آ زور شاغا۔ اوپارے کہ امت مسلمہ نا زمواری ئِ کہ او فرقہ واریت آن مرمریر و دنیا نا امن نا رکھ ئِ کیر۔ اوتعلیمی نصاب ئِ بدلینگوک آ دنیا نا گرج آتا رداٹ موثر وڑاٹ تیار کننگ نا گرج آ ہم زور شاغا۔ صدر پارے کہ میڈیا راج اٹی دولت و پرتعیش زند انا رجحان آتے غیر المی وڑاٹ مون آ دننگ ئِ۔ اومسلمان اسکالر آتیا زورشاغا کہ او سہی تشخص ئِ مون آ دننگ کن میڈیا نا نمائندہ غاتا راہشونی ئِ کیر، صدر داہیت آ است جمی نا درشانی ئِ کرے کہ جہانی اسلامی یونیورسٹیاسلامی دنیا ٹی تینا وڑنا اولیکو یونیورسٹی ئِ ہرانا مسخت دانشور آتے تیار کننگ نا ئِ ہرا نئے بیرہ اسلام نا دانشور انہ بنداو آتا رکھ ئِ کننگ ئُ بلکن اسلامی دنیا نا سروکی ئِ ہم کننگ ئُ۔ صدر پارے کہ اسلام نا حقی تشخص ئِ تالان کننگ کن استاد و طالب علم آتا کڑد بھاز نمان ئِ۔ اوپارے کہ امت مسلمہ وپاکستان ئِ داوخت مشکل وخت اتون مون تروکی ئِ و میڈیا نا کمک اٹ واقعہ غاتے منفی وڑاٹ پیش کننگ آن ویل ودی مننگ ئِ۔اوپارے کہ داحالیت آتیان راج اٹی اقتصادی عدم توازن ودی مننگ ئِ۔ اوطالب علم آتون پارے کہ او زیات آن زیات تعلیم حاصل کیر وپاکستانی زالبول نا وڑاٹ تینا شناخت و تینا احترام آ وخت اس ہم سمجھوتہ کپس۔
