خاران۔ 21 فروری (اے پی پی) چیف جسٹس بلوچستان ہائی کورٹ نور محمد مسکانزئی پارینے کہ الس ئِ اوفتا درگہ غا ہڑزان و بروخت انصاف ترفنگ کن عدلیہ نا اہم ئُ کڑد اس مریک و خلقت ئِ عدلیہ آن بھلو اومیت اس ارے ہرافتے عملی وڑاٹ بروخت ہڑزان انصاف مہیا مننگ کے۔ داخیال آتا درشانی ئِ او ڈسٹرکٹ بار نا وکیل آتون اوڑدہی و جوڈیشل کمپلیکس زیر تعمیر ڈٹ انا معائنہ ٹی کرے۔ چیف جسٹس پارے کہ خلقت نا عدلیہ و وکیل آتون چولی دامن تون تفوک ئِ۔ وکیل آک تینا لائخی تے کاریم اٹ اتسا خلقت ئِ اوفتا درگہ غا انصاف مہیا کیر، داوخت آ ڈسٹرکٹ بار نا صدر اشفاق احمد سفاسنامہ پیش کرے و تینا ایسر نا چاری ویل آتیان معلومدار کرے وخت اس کہ زیر تعمیر جوڈیشل کمپلیکس نا جوڑ جاڑ نا بابت سی اینڈ ڈبلیو نا ایکسین شہاب بریفنگ ترسا پارے کہ دا ڈٹ آ پنچ کروڑ روپئی خڑچ کننگ انگ ئِ ہراکہ کاریم نا رفتار ترندی اٹ برجاہ ئِ، چیف جسٹس بلوچستان ہائی کورٹ نور محمد مسکانزئی پارے کہ جوڈیشل کمپلیکس نا اڈتننگ آن دا علاقہ نا خلقت ئِ عدلیہ نا بابت مشکل آتون مون تروئی مفک ، و اوفتا درگہ غا انصاف نا فراوانی ئِ ممکن کننگ مریک۔ اوزیر تعمیر جوڈیشل کمپلیکس نا کیہی بشخ آتا ہم معائنہ ئِ کرے و تعلقدار آفیسر آتے پارت جاری کرے کہ او تخوک آ وخت اٹی دا ڈٹ آتے پورو کرفیر۔
