خاران۔ 21 فروری (اے پی پی) بنجائی وزیر سیفران جنرل (ر) عبدالقادر بلوچ پارینے کہ ساڑی حکومت بلوچستان نا جوڑ جاڑ و شونداری و شونہالی کن خاطر خواہ گام گیج کننگ ئِ، سی پیک نا پوروی آن نئے بیرہ بلوچستان بلکن مچ آ ڈیہہ ٹی روزگار نا وارخواہی ودی مریک، سوگو پاکستان کن شونہال بلوچستان المی ئِ ورناک توفک آتے خسسا قومی دنگ اٹی اوار مریر و ورناک کتاب و قلم تون رشتہ ئِ سوگو کیر، ساڑی حکومت نا امن و ایمنی اولین اولیت ئِ و اخس کہ مننگ کے صوبہ ئِ امن و ایمنی نا جاگہ اس جوڑ کننگ مرے۔ داخیال آتا درشانی ئِ او سے شنبے آ امیر قطر نا کنڈآن تروک آ ایمبولینس نا بشخ وپانٹ اٹی تران کرسا کرے۔ بنجائی وزیر خاران نا ڈپٹی کمشنر قادر بخش پرکانی ، ڈپٹی کمشنر واشک، عالم فراز محمد حسنی ئِ ایمبولینس نا چابی تس، ضلع واشک نا 6 وخت اس کہ ضلع خاران ئِ 4ایمبولینس تننگانے، دود اٹی باسک صوبائی اسمبلی میر عبدالکریم نوشیروانی و بڑزکو افسر آتون اوار علاقہ نا سرکڑدہ غاک ہم ساڑی ئسر۔ بنجائی وزیر سیفران جنرل (ر) عبدالقادر بلوچ پارے کہ نن مثبت سیاست آ یخین تخنہ و عملی وڑاٹ علاقہ نا جوڑ جاڑ و شونداری و شونہالی کن تینا کڑدئِ ادا کننگ ئُ، بنجائی حکومت خاص کر وزیراعظم محمد نواز شریف و وزیراعلیٰ بلوچستان نواب ثناءاللہ خان زہری نا جندی است خواہی نا کمک اٹ بلوچستان اٹی شونداری نا تسلسل ئِ برجاہ تخانے و الیکشن اٹی ہراوعدہ الس تون کننگاسس اوڑآ عملی وڑاٹ گام گیج ترندی اٹ برجاہ ئِ و ارب آ روپئی ضلع خاران واشک و پنجگور نا شونداری آ خڑچ کننگ انگ ئُ وخت اس کہ سی پیک نا پوروی آن دا ڈیہہ ٹی شونداری نا پوسکن آ کسرآک ہموار مریرہ ہراڑآن ڈیہہ ٹی شونہالی و شونداری نا کنڈاروان مریک۔ اوپارے کہ نن تنقید آن بیدس عملی گام گیج آ یخین تخنہ ، علاقہ ٹی تعلیم ، جان جوڑی ، آبنوشی ، بجلی نا فراوانی ، روڈ آتا جوڑ جاڑو ڈیم تا جوڑ جاڑ تون اوار ایلو بشخ آتیا خصوصی گام گیج مننگ ئِ وخت اس کہ داڈٹ آتیان روزگار نا پوسکن ئُ وارخواہی ودی مریک بنجائی وزیر مستی پارے کہ سوگو پاکستان کن شونہال بلوچستان المی ئِ ورناک توفک آتے خسسا قومی دنگ اٹی اوار مریر و ورناک کتاب و قلم تون رشتہ ئِ سوگو کیر۔ اوپارے کہ ساڑی حکومت نا امن و ایمنی اولین اولیت ئِ و اخس کہ مننگ کے صوبہ ئِ امن و ایمنی نا جاگہ اس جوڑ کننگ مرے، داوخت آ باسک صوبائی اسمبلی عبدالکریم نوشیروانی دود آن تران کرسا علاقائی کہول آ سیوت نا پڑو ئِ کرے و اسیجائی وڑاٹ علاقہ نا خذمت نا عزم ئِ کریر و بروک آ مشترکہ وڑاٹ علاقہ نا سیاست اٹی بشخ ہلنگ نا ہم فیصلہ کرے۔
