ترکی نا بڑزکو کہولی اسٹریٹجک کمکار کونسل نا پنچ می دیوان اٹی بشخ ہلیک، بنجائی وزیرآک و بڑزکو کمامدارآتیا تالان بڑزکو کہولی ڈل ہم وزیراعظم تون اوار مریک
اسلام آباد۔ 21 فروری (اے پی پی) وزیراعظم محمد نواز شریف (اینو) چارشنبے آ ترکی نا 3 دے ئی دورہ غا رادہ مریک۔ وزیراعظم پاکستان ترکی نا بڑزکو کہولی سٹریٹجک کمکار کونسل (ایچ ایل ایس سی سی ) نا پنچ می دیوان اٹی بشخ ہلیک۔کیہی بنجائی وزیر آک و بڑزکو کمامدارآتیا تالان بڑزکو کہولی ڈل ہم وزیراعظم تون اوار مریک۔ دورہ ٹی وزیراعظم جتا ہڑتوم آ کنڈآتا علاقائی و جہانی معاملہ غاتیا ترک سروک آتون وسیع تر صلابت و خیال آتا درشانی ئِ کیک۔ وزیراعظم محمد نواز شریف ترک وزیراعظم بن علی یلدرم تون اوار پنچ شنبے آ انقرہ ٹی پاک ترک بڑزکو کہولی اسٹریٹجک کمکار کونسل نا پنچ می دیوان نا اسیجائی کماشی ئِ ہم کیرہ۔ پاک ترک بڑزکو کہولی کمکار کونسل نا اڈتننگ 2009 ءٹی ہڑتوم آ ملک آتا نیام اٹ بڑزکو سیاسی کہول آ صلابت کن فریم ورک نا وڑاٹ عمل اٹی اتنگا۔ دا میکنزم ہڑتوم آ کنڈآتا سروک آتے سٹریٹجک فوکس و راہشونی فراوان کننگ و آخبت کن اسہ وژن اس ترتیب تننگ اٹی کمکاری کیک۔ کونسل نا رداٹ 6اسیجائی ورکنگ گروپ آک کاریم کننگ ئُ ہرافتے ٹی واپار، توانائی ، بینکنگ و فنانس، مواصلات ، ریلوے ، تعلیم و دودوربیدہ و سیل و سوات نا بشخ آک اوار ئُ۔ کونسل نا دسمبر 2010ء، مئی 2012ئ، ستمبر 2013ءو فروری 2015ءٹی چار دیوان اڈ ہلکونے۔ آخریکو دیوان 17 فروری 2015ءآ اسلام آباد اٹی اڈ ہلکوسس۔ کونسل نا فریم ورک نا رداٹ ہڑتوم آ ملک آتا نیام اٹ 50 آن زیات معاہدہ و مفاہمت نا یات داشت آتے گڈیکو دروشم تننگانے۔ کونسل نا پنچ می دیوان نا ایسری آ اسہ اسیجائی اعلامیہ اس جاری کننگک وخت اس کہ داوخت آ کیہی معاہدہ و مفاہمتی یات داشت آتیا دستخط نا ہم اومیت ارے۔ دورہ ٹی وزیراعظم محمد نواز شریف ترک صدر رجب طیب اردوان تون ہم اوڑدہی کیک۔ وزیراعظم محمد نواز شریف 15جولائی 2016ءآ ترکی ٹی بے سہب بغاوت نا برخلاف پاکستان نا حکومت و الس نا کنڈآن یکجہتی و غیر متزلزل مخ تفی نا عزم انا درشانی ئِ کننگ کن ترک پارلیمان نا دورہ ئِ ہم کیک۔ بغاوت نا نن ترک پارلیمان ئِ بمباری نا نشانہ جوڑ کننگاسس۔ وزیراعظم محمدنواز شریف ترکی ٹی جمہوریت نا دفاع کن تینا جان تے ندر کروک آتے خراج عقیدت ہم پیش کیک۔ پاکستان و ترکی نا نیام اٹ تعلقداری ریاست آتا نیام اٹ تعلقداری نا بابت انفرادی حیثیت تخک ہرا غیر معمولی گرم جوشی و تین پہ تینی پت آ استوار ئِ۔ دا برادرانہ تعلقداری نا بنداو اسیجائی عقیدہ ، تاریخ، دودوربیدہ و زبان تیٹی تعلق آ ٹی ئِ۔ ہڑتوم آ قومک کشمیر و قبرص تون اوار تینا قومی مسخت آتے کن اسہ ایلو تون تین پہ تینی کمک کرسا کرینو۔ پاکستان و ترکی نا نیام اٹ ہڑتوم آ کنڈآتا تعلقداری ئِ ساڑی آ سال تیٹی اسہ پوسکن ئُ جہت و فروغ اس ملانے و دا تعلقداری تا دنگ اقتصادی تعلقداری آن ہلیس دفاعی کمکاری و تعلیمی و دودوربیدہ ہی رابطہ غاتا مون آ دننگ اسکان بھلن مسنے۔ ہڑتوم آ کنڈآتا واپار، زرکاری و واپاری کمکاری ئِ مون آ درسا تینا اقتصادی شریداری ئِ پین گچین جوڑ کننگ کن کوشست کننگ ئِ۔ ہڑتوم آ ملک آتا سروک آک 21می صدی نا حق آتے مون آ تخسا تینا تاریخی تعلقداری تے اسہ سوگو ئُ اسٹریٹجک شریداری اسے ٹی بدلیفنگ نا عزم تخک۔ اینخو سال پاکستان و ترکی نا سفارتی تعلقداری نا 70می سال دے ہم اڈتننگ انگ ئِ و داچرجوئی ٹی ہڑتوم آ ملک آک بھاز انگا خصوصی پروگرام و دود اڈتننگ ئُ۔ وزیراعظم محمد نواز شریف نا دورہ ترکی و پاک ترک بڑزکو کہولی سٹریٹجک کمکارکونسل نا پنچ می دیوان اٹی بشخ ہلنگ آن ہڑتوم آ برادر ملک آتا نیام اٹ تاریخی و آزموندہ تعلقداری تے پین مون آ دننگ رسینگک و ہڑتوم آ ملک آتانیام اٹ کیہی بشخ آتیٹی تعلقداریک پین سوگو مریرہ۔
